تریمتاں چھاتی دے سرطان توں بچݨ کیتے وقتی تشخیص کوں ترجیح ݙیون، خاتونِ اول آصفہ بھٹو زرداری

اسلام آباد۔1 اکتوبر (اے پی پی) خاتونِ اول آصفہ بھٹو زرداری تریمتاں تے زور ݙتے جو او چھاتی دی صحت کوں سنجیدگی نال گھنن تے جسم اچ کتھائیں وی غیر معمولی تبدیلی دی صورت اچ فوری طور تے طبی مشورہ حاصل کرن، چھاتی دا سرطان قابلِ علاج مرض اے جݙاں جو وقتی تشخیص تے فوری علاج توں قیمتی انسانی جاناں بچائیاں ونڄ سڳدن۔ صدارتی سیکرٹریٹ دے میڈیا ونگ موجب چھاتی دے سرطان توں آگاہی دے مہینے دے آغاز تے اپݨے پیغام اچ خاتونِ اول آکھیا جو جاری مہینہ تریمتاں کوں اے یاد ݙیواوݨ دا اہم موقع ݙیندے جو اپݨی صحت دا خیال رکھݨ دا مطلب اپݨے جسم توں آگاہ رہݨ تے کہیں وی غیر معمولی تبدیلی دی صورت اچ وقتی اقدام کرݨ وی اے۔ انہاں آکھیا جو باقاعدگی نال خود معائنہ کرݨ نال تریمتاں اپݨے جسم اچ معمول دیاں تبدیلیاں توں آگاہ رہ سڳدن تے اے جاݨ سڳدن جو کݙاہیں انہاں کوں طبی مشورہ حاصل کرݨ دی لوڑھ اے۔ انہاں آکھیا جو 50 سال توں ودھ عمر دیاں تریمتاں کوں اسکریننگ خدمات دیاں حامل سہولتاں تے باقاعدگی نال میموگرام تے غور کرݨا چاہیدے۔ انہاں اے وی نشاندہی کیتی جو تریمتاں باقاعدگی نال میموگرافی اسکریننگ نی کرویندیاں انہاں اچ چھاتی دے سرطان دے 90 فیصد توں ودھ کیسز دا خود تشخیص دے ذریعے پتہ لڳدے ایں کیتے جسم اچ تھیوݨ آلی تبدیلیاں دی آگاہی اہم اے۔