وزیراعظم محمد شہباز شریف دی چین دے قومی ݙینھ دے موقع تے صدر شی جن پنگ تے عوام کوں مبارخ ، نیک تمناواں دا اظہار

اسلام آباد۔1 اکتوبر (اے پی پی) وزیراعظم محمد شہباز شریف چین دے قومی ݙینھ دے موقع تے صدر شی جن پنگ تے چین دے بھرا عوام کوں دلوں مبارخ ݙیندے انہاں کیتے نیک تمناواں دا اظہار کیتے۔ سوشل میڈیا پلیٹ فارم ایکس تے ہک پیغام اچ وزیراعظم آکھیا جو ایں تاریخی ݙینھ تے پوری پاکستانی قوم میݙے نال چین دی شاندار کامیابیاں تے صدر شی جن پنگ دی بصیرت افروز قیادت اچ ترقی دے متاثر کن سفر کوں خراجِ تحسین پیش کریندے خوشیاں منیندی پئی اے۔ انہاں آکھیا جو ایں سال ڄݙاں اساں پاکستان تے چین وچال سفارتی تعلقات دے قیام دے 75 سال مکمل تھیوݨ دا جشن منیندے پیوں، اساں کوں ݙوہیں ملکاں تے عوام وچال آہنی تے ہرآزمائش تے پوری لہݨ آلی سٹریٹجک تعاون تے مبنی شراکت داری تے ماݨ اے۔ وزیراعظم آکھیا جو اساݙی اقتصادی شراکت داری سی پیک 2.0 دے ذریعے مسلسل فروغ پیندی پئی اے جیندے اچ زراعت، آئی ٹی و ٹیکنالوجی، کان کنی و معدنیات تے صنعت دے شعبیں اچ تعاون تے توجہ مرکوز کیتی ویندی پئی اے۔ انہاں آکھیا جو دعا اے جو پاکستان تے چین ہمیشہ ہک ٻئے دے رلے کھڑے رہن تے نویں عہد اچ مشترکہ مستقبل دے حامل پاکستان۔چین معاشرے دی تعمیر کیتے مزید قربت تے ترقی دی پاسے مسلسل اڳوں ودھدے رہن۔