معاشی استحکام اجتماعی کوششاں دا نتیجہ اے، قومی معیشت ہݨ صنعت کاری تے برآمدات اچ ودھارے تے مبنی پائیدار ترقی تے روزگار پیدا کرݨ تے توجہ مرکوز کرݨ دی متقاضی اے، پاکستان دنیا دے نقشے تے ہک طاقتور معیشت بݨ تے ابھرسی، وزیراعظم محمد شہباز شریف

کراچی۔1 اکتوبر (اے پی پی) وزیراعظم محمد شہباز شریف معاشی استحکام کوں ٹیم ورک تے مسلسل محنت دا نتیجہ قرار ݙیندے آکھیے جو قومی معیشت ہݨ صنعت کاری تے برآمدات اچ ودھارے تے مبنی پائیدار ترقی تے روزگار پیدا کرݨ تے توجہ مرکوز کرݨ دی متقاضی اے، معیشت کوں تکڑا بݨاوݨ کیتے نجی شعبے تے سرمایہ کاراں دا کردار کلیدی اے، تعمیراتی صنعت دا ودھارا ملکی معیشت تے روزگار کیتے ضروری اے، معاشی حالات دی بہتری اچ سیاسی تے عسکری قیادت دا سانجھا تعاون اہم اے، حکومت سنجیدگی دے نال لمبے عرصے توں زیرِ التوا اصلاحات کوں عملی جامہ پوائے، پاکستان ان شاء اللہ دنیا دے نقشے تے ہک طاقتور معیشت بݨ تے ابھرسی۔ انہاں اے ڳالھ اتھاں نیا ناظم آباد اپارٹمنٹس دی لسٹنگ دے موقع تے پاکستان سٹاک ایکسچینج اچ منعقدہ گونگ تقریب نال ورچوئل خطاب کریندے آکھی۔ ایں موقع تے وفاقی وزراء عطا اللہ تارڑ، میاں ریاض حسین پیرزادہ، ڈاکٹر مصدق ملک وزیراعظم دے رلے موجود ہن جݙاں جو تقریب اچ وزیرِخزانہ محمداورنگزیب، گورنر سٹیٹ بینک آف پاکستان، ممتاز کاروباری رہنما عارف حبیب تے کارپوریٹ شعبے دیاں اہم شخصیات شرکت کیتی۔ تقریب اچ کیک وی کٹیا ڳئے۔وزیراعظم اپݨے خطاب اچ آکھیا جو پاکستان کوں ہݨ اپݨی معیشت اچ ترقی، بالخصوص برآمدات تے مبنی گروتھ ݙکھاوݨی ہوسی، جیندے نتیجے اچ روزگار، پیداواری سرگرمیاں، اشیا و خدمات دی ترسیل تے برآمدات اچ ودھارا تھیسی تے پاکستان دی معیشت کوں مزید استحکام ملسی جݙاں جو نجی شعبے کوں اڳوں ودھݨا ہوسی۔ وزیراعظم آکھیا جو پاکستان انشاء اللہ دنیا دے نقشے تے ہک ٻہوں طاقتور معیشت بݨ تے ابھرسی تے دنیا اچ پاکستان دی عزت تے وقار اچ ٻہوں ودھارا تھیسی۔ انہاں آکھیا جو پاکستان دی معیشت کوں اوکھے حالات توں کڈھ تے اپݨے پیراں تے کھڑا کرݨ کیتے وفاقی حکومت تے متعلقہ اداریں وچال تھیوݨ آلا ٹیم ورک مثالی اے جیندے تے وزیرِ خزانہ، انہاں دی ٹیم، متعلقہ وزراء، صوبائی وزرائے اعلیٰ تے ٻئے اداریں دے سربراہان مبارخ تے تحسین دے مستحق ہن۔وزیراعظم نیویارک تے لندن اچ اپݨے دوریں دے دوران بین الاقوامی بینکاراں تے مالیاتی شعبے دے رہنماواں بشمول سٹی بینک، جے پی مورگن تے بارکلیز دے اعلیٰ عہدیداراں نال ملاقاتاں دا حوالہ ݙیندے آکھیا جو عالمی مالیاتی اداریں پاکستان دی طرفوں لمبے عرصے توں زیرِالتوا ڈھانچہ جاتی اصلاحات تے عملدرآمد دی تعریف کیتی تے آکھیےجو حکومت سنجیدگی دے نال لمبے عرصے توں زیرِ التوا اصلاحات کوں عملی جامہ پوائے جیندے نتیجے اچ اڄ پاکستان اچ پرکشش حالات ݙٹھے ویندے پئن۔ انہاں ݙسایا جو نیویارک اچ منیجنگ ڈائریکٹر آئی ایم ایف نال ملاقات دے دوران انہاں آکھیا جو ”پرائم منسٹر، اے نواں پاکستان اے“ جیندے تے میں جواب ݙتا جو اے نواں پاکستان کائنی بلکہ ہک نویں ٹیم اے جنہاں رل تے پاکستان دے معاشی حالات کوں سدھارئے۔محمد شہباز شریف آکھیا جو اے ٹیم ورک اے جیندے اچ سیاسی تے عسکری قیادت عظیم شراکت داراں دے طور تے ایں انتہائی ذمہ واری دے کم کوں اڳوں گھن تے چلدی پئی اے۔ انہاں آکھیا جو ایویں ٻاہرلی ترسیلاتِ زر اچ ودھارا تھیا، آئی ٹی برآمدات ودھیاں تے روشن ڈیجیٹل اکاؤنٹ وی چنڳی کارکردگی ݙکھیندا پئے۔ ہݨ اصل لوڑھ اے ہے جو پاکستان دی معیشت اچ گروتھ ݙکھائی ونڄے تے اے بنیادی طور تے برآمدات تے مبنی گروتھ دے ذریعے تھیوݨی چاہیدی اے۔ ایں توں روزگار، پیداواری روزگار، پیداوار، اشیا تے خدمات دی ترسیل تے برآمدات اچ ودھارا تھیسی، جیندے نال پاکستان دی معیشت کوں مزید تقویت ملسی۔وزیراعظم آکھیا جو اے سارے کم نجی شعبے کرݨا اے، ایں مقصد کیتے حکومت دی طرفوں اعلان کیتے ڳئے بجٹ اچ برآمد کنندگان، مینوفیکچررز تے صنعتاں کیتے کئی سو ارب روپے دیاں ٹیکس مراعات رکھیاں ڳئن۔ انہاں تعمیراتی صنعت دا ذکر کریندے عارف حبیب کوں نویں ناظم آباد کوں ”ریٹ“ دے اسٹرکچر اچ لانچ کرݨ تے مبارخ ݙتی تے آکھیا جو لاہور تے کراچی اچ ایں اسٹرکچر دے اندر رہندے تعمیر کیتے ڳئے پروجیکٹس قابلِ تعریف ہن۔ کیپٹل مارکیٹ دی کارکردگی دی تعریف کریندے آکھیا جو ایں اچ ٻہوں چنڳی پرفارمنس اے، تاں جو ہݨ وی ایں اچ کجھ سقم تے کمزوریاں ہن۔ انہاں آکھیا جو خطے دے ملکاں دیاں سٹاک ایکسچینجز کوں سامݨے رکھیندے کیپٹل مارکیٹ اچ جیڑھیاں تبدیلیاں گھن آوݨیاں چاہیدن ، انہاں کیتے فوری اقدامات چاوݨے چاہیدن۔محمد شہباز شریف کجھ ایجھیاں صنعتاں دی کارکردگی تے تشویش ظاہر کیتی تے درآمدی متبادل دے مقصد کیتے قائم کیتیاں ڳیاں صنعتاں دا ذکر کریندے آکھیا جو تقریباً 60 سال پہلے ایں حوالے نال ہک مضبوط وژن دے تحت کجھ صنعتاں قائم کیتیاں ڳیاں، انہاں کوں سپورٹ تے سبسڈی ݙتی ڳئی تاں جو اے صنعتاں ترقی کرن، روزگار تے پیداواری روزگار ݙیون تے اپݨی پیداوار اڳوں ودھاون۔ انہاں قومی مفاد کوں ذاتی مفادات تے ترجیح ݙیوݨ تے دیانت دارانہ طرزِ عمل اختیار کرݨ تے زور ݙیندے آکھیا جو ترقی جدید مشینری، پیداواری صلاحیت تے محنت نال ہی ممکن اے۔وزیراعظم آکھیا جو حالت ایں ویلھے بدلسی ڄݙاں خون پسینہ وہایا ونڄے، ݙینھ رات محنت کیتی ونڄے تے پاکستان کوں ایں مقام تئیں گھن آیا ونڄے جیڑھا ایں دا مقام اے۔ انہاں ہک واری ول عارف حبیب کوں مبارخ ݙیندے آکھیے جو بجٹ اچ کنسٹرکشن انڈسٹری کیتے ݙتیاں ونڄݨ آلیاں مراعات دے نتائج آہستہ آہستہ سامݨے آندے پئن تے کراچی اچ بالخصوص اے صنعت ہݨ ٹیک آف کریندی پئی اے، جݙاں جو پاکستان دے ٻئے حصیں اچ وی انہاں دے اثرات آوݨ شروع تھی ڳئن۔وزیراعظم آکھیا جو ایں شعبے تے بھرپور توجہ ݙیوݨی ہوسی۔ انہاں آکھیا جو اے آکھݨ کافی نی جو 40 صنعتاں دیاں مصنوعات کنسٹرکشن انڈسٹری اچ استعمال تھیندن، بلکہ فائلز دے ایکسچینج کوں ختم کرݨا ہوسی۔ وزیراعظم محمد شہباز شریف آکھیا جو اے ہک شاندار ٹیم ورک اے تے ٹیم ورک دے بغیر کݙاہیں نتیجے نی ملدے۔ انہاں آکھیا جو اے ہک روشن مثال اے جیندے تے اڳوں چل تے ہر شعبے اچ عمل کیتا ونڄے تاں ان شاء اللہ نتیجے ٻہوں چنڳے تے خوشگوار تھیسن۔ انہاں چیئرمین نیب دیاں کوششاں دی تعریف کریندے آکھیا جو انہاں ارباں نی بلکہ کھرباں روپے دیاں زمیناں نہ صرف ریکور بلکہ ڈسکور کیتن۔ وزیراعظم لینڈ بینک قائم کرݨ دے منصوبے دی وی تعریف کیتی۔انہاں وزیرِ خزانہ، کابینہ دے ارکان، فیڈرل بورڈ آف ریونیو (ایف بی آر) تے وفاقی سیکرٹریز دا خصوصی طور تے شکریہ ادا کریندے آکھیا جو انہاں معاشی استحکام دا ایہوجیھا قابلِ عمل ماڈل قائم کیتے جئیں کوں ٻئے شعبیں اچ وی اختیار کیتا ونڄ سڳدے تے جیندے نتیجے اچ پاکستان پائیدار ترقی دے رستے تے ولدا آئے ۔ وزیراعظم آکھیا جو اصلاحات تے کامیاب عملدرآمد تے معاشی استحکام سیاسی تے مالیاتی قیادت وچال مکمل ہم آہنگی تے مبنی مربوط شراکت داری دا نتیجہ اے۔اہم معاشی اشاریں دا ذکر کریندے انہاں آکھیا جو پاکستان 3 ارب ڈالر مالیت دے یورو بانڈ دا کامیاب اجرا کیتا جیندے کیتے 6 ارب ڈالر دیاں پیشکشاں موصول تھیاں جݙاں جو سٹیٹ بینک دے زرِ مبادلہ دے ذخیرے ودھ تے تقریباً 21.4 ارب ڈالر تے کمرشل بینکاں دے ذخائر 5.5 ارب ڈالر تئیں پڄ ڳئن۔ انہاں آکھیا جو ترسیلاتِ زر تے آئی ٹی برآمدات اچ وی ودھارا تھیندا پئے جݙاں جو روشن ڈیجیٹل اکاؤنٹ دی کارکردگی وی حوصلہ افزا اے۔تاں جو وزیراعظم استحکام توں ترقی دی پاسے پیش قدمی تے زور ݙیندے آکھیا جو ملکی معیشت کوں ٹیکنالوجی، روزگار دے موقع، پیداوار تے برآمدات تے مبنی اقتصادی ترقی دے ذریعے اڳوں ودھاوݨ کیتے مزید اقدامات کرݨے ہوسن۔ انہاں یاد ݙوایا جو مالی سال 2026-27ء دے وفاقی بجٹ اچ برآمد کنندگان، صنعت کاراں تے مختلف صنعتی شعبیں بشمول تعمیرات دے شعبے کیتے سینکڑاں ارب روپے دیاں ٹیکس مراعات تے سہولتاں ݙتیاں ڳئن۔وزیراعظم محمد شہباز شریف چیف آف ڈیفنس فورسز تے چیف آف آرمی اسٹاف فیلڈ مارشل سید عاصم منیر کوں قومی سلامتی تے معاشی ترقی کیتے مسلسل حمایت تے عزم تے خراجِ تحسین پیش کیتا۔ انہاں آکھیا جو ایہوجہیاں مخلصانہ تے مسلسل کوششاں دے ذریعے پاکستان ہک تکڑی معیشت بݨ تے ابھرسی تے اقوامِ عالم اچ اپݨا مقام تے ناں پیدا کریسی۔ایں توں پہلے ممتاز کاروباری شخصیت عارف حبیب تقریب نال خطاب کریندے آکھیا جو پاکستان دی کیپٹل مارکیٹ دی کارکردگی علاقائی مارکیٹاں دے مقابلے اچ نمایاں رہی اے، کیپٹل مارکیٹ دی پاسے سرمایہ کاراں دا رجحان ودھدا پئے، پاکستانی کرنسی دی قدر اچ ودھارا تھیندا پئے۔ انہاں آکھیا جو مقامی سرمایہ کاراں کوں پاکستان اچ موجود سرمایہ کاری دے موقعیں توں فیدہ چاوݨا چاہیدے۔ عارف حبیب آکھیا جو عالمی سرمایہ کار پاکستان دی معاشی صورتحال تے حکومتی پالیسیاں تے نظر رکھئے ہوئن، لہٰذا پاکستان کوں عالمی سطح تے زیادہ بہتر انداز اچ اجاگر کرݨ دی لوڑھ اے۔