وزیراعظم دا ماہانہ معاشی آئوٹ لک رپورٹ اچ ملکی معیشت دے اہم اشاریں دی بہتری دا خیرمقدم، ترسیلاتِ زر اچ ودھارا ٻاہرلے ملک رہݨ آلے پاکستانیاں دا ملکی معیشت تے اعتماد کوں ظاہر کریندے، محمد شہباز شریف

اسلام آباد۔1 اکتوبر(اے پی پی) وزیراعظم محمد شہباز شریف ماہانہ معاشی آئوٹ لک رپورٹ اچ ملکی معیشت دے اہم اشاریں اچ بہتری دا خیرمقدم کریندے آکھیے جو ترسیلاتِ زر اچ ودھارا ٻاہرلے ملک رہݨ آلے پاکستانیاں دا ملکی معیشت تے اعتماد دا مظہر اے، کرنٹ اکائونٹ خسارے اچ کمی تے براہِ راست غیر ملکی سرمایہ کاری اچ ودھارا معاشی استحکام دی پاسے مثبت پیش رفت کوں ظاہر کریندے ۔وزیراعظم دفتر دے میڈیا ونگ توں جاری بیان موجب وزیراعظم آکھیا جو جولائی تے اگست اچ ترسیلاتِ زر 6.3 ارب ڈالر توں ودھ تے 7.3 ارب ڈالر تھی ڳیاں، اگست اچ ترسیلاتِ زر اچ گزریل سال دے مقابلے اچ 16.5 فیصد ودھارا چنڳی ڳالھ اے۔وزیراعظم آکھیا جو ٻاہرلے ملک رہݨ آلے پاکستانی اساݙا قیمتی اثاثہ ہن جہڑے اپݨی محنت دی کمائی وطن ولدا بھجیندن، برآمدات اچ 4 فیصد ودھارا ملکی معیشت کیتے حوصلہ افزا پیش رفت اے۔ انہاں آکھیا جو حکومت برآمدی شعبے دی ترقی تے چھوٹے و درمیانے درجے دیاں صنعتاں کوں ہر قسم دی سہولت ݙیوݨ کیتے اقدامات کریندی پئی اے، کرنٹ اکائونٹ خسارے اچ کمی تے براہِ راست غیر ملکی سرمایہ کاری اچ ودھارا معاشی استحکام دی پاسے مثبت پیش رفت کوں ظاہر کریندے۔وزیراعظم آکھیا جو جولائی تے اگست اچ مجموعی غیر ملکی سرمایہ کاری اچ 80.2 فیصد ودھارا سرمایہ کاراں دے ودھدے اعتماد دا مظہر اے، حکومت سرمایہ کاراں کوں موزوں ماحول ݙیندی پئی اے تاں جو ملک اچ معاشی سرگرمیاں بہتر تھیون۔ انہاں آکھیا جو پاکستان دے زرِ مبادلہ دے ذخیرے 26.8 ارب ڈالر تئیں پڄݨ معیشت دے ٻاہرلے شعبے اچ بہتری دی عکاسی کریندے، معیشت کوں مستحکم کرݨ کیتے حکومت اصلاحات تے موثر معاشی پالیسیاں تے عملدرآمد جاری رکھیسی۔وزیراعظم آکھیا جو ملکی معیشت کوں پائیدار بنیاداں تے استوار کرݨ حکومت دی اولین ترجیح اے، وݙیاں صنعتاں دی پیداوار اچ ودھارا معاشی سرگرمیاں اچ بہتری دی علامت اے۔ وزیراعظم آکھیا جو جولائی اچ وݙیاں صنعتاں دی پیداوار اچ 3.03 فیصد ودھارا حوصلہ افزا اے، زرعی قرضیں اچ ودھارا زرعی شعبے دی ترقی تے کساناں دی مالی معاونت کیتے اہم پیش رفت اے۔وزیراعظم آکھیا جو کمپنیاں دی رجسٹریشن اچ نمایاں ودھارا کاروباری سرگرمیاں دے ودھارے دا مظہر اے، جولائی اچ کمپنیاں دی رجسٹریشن 38.8 فیصد ودھارے نال 10,199 تھی ڳئی۔ وزیراعظم آکھیا جو پاکستان سٹاک ایکسچینج اچ نمایاں ودھارا سرمایہ کاراں دے اعتماد اچ بہتری ظاہر کریندے، حکومت معیشت دے سارے شعبیں اچ اصلاحات تے سرمایہ کاری دے ودھارے دے ذریعے معاشی نمو کوں مزید مستحکم کریسی۔ وزیراعظم آکھیا جو معاشی استحکام دے ثمرات عوام تئیں پڄاوݨ تے روزگار و کاروبار دے مزید موقع پیدا کرݨ کیتے حکومت اپݨی کوششاں جاری رکھیسی، پاکستان کوں ہک مضبوط، مستحکم تے پائیدار معیشت بݨاوݨ کیتے اصلاحات دا عمل مزید تکھا کیتا ویسی۔