صدرِ مملکت آصف زرداری نال وزیراعظم محمد شہباز شریف دی ملاقات

اسلام آباد۔1 اکتوبر (اے پی پی)صدرِ مملکت آصف علی زرداری اتے وزیراعظم محمد شہباز شریف ملکی سلامتی دی صورتحال دا جائزہ گھندے دہشت گردی دے خلاف قومی عزم کوں مزید مضبوط بݨاوݨ تے ملک دے امن و استحکام کیتے متعلقہ اداریاں وچال موثر تعاون تے زور ݙتے، خیبر پختونخوا دی سیکیورٹی صورتحال تے چنتا کریندے طے تھئے جو وفاقی حکومت اتے پاکستان پیپلز پارٹی دا مشترکہ وفد جمعے کوں پی ٹی آئی قیادت نال مل تے موجودہ سیاسی صورتحال تے مذاکرات کریسی۔ ایوان صدر دے اعلامیے دے مطابق صدرِ مملکت آصف زرداری نال وزیراعظم محمد شہباز شریف ایوانِ صدر اسلام آباد اچ ملین۔ انہاں مجموعی سیاسی اتے سیکیورٹی صورتحال تے الیندے خاص کر خیبر پختونخوا دی سیکیورٹی صورتحال تے چنتا کیتے۔ ملاقات اچ نائب وزیراعظم و وزیرِ خارجہ سینیٹر محمد اسحاق ڈار، وفاقی وزیرِ داخلہ محسن نقوی، وفاقی وزیرِ قانون و انصاف سینیٹر اعظم نذیر تارڑ، وزیراعظم دے مشیر برائے سیاسی امور سینیٹر رانا ثناء اللہ، اٹارنی جنرل آف پاکستان منصور عثمان اعوان، وزیراعظم دے مشیر ڈاکٹر توقیر شاہ، سینیٹر شیری رحمان، سینیٹر سلیم مانڈوی والا، سندھ دے سینئر وزیر شرجیل انعام میمن تے صوبائی وزیر سید ناصر حسین شاہ وی شریک ہن۔ طے تھیا جو وفاقی حکومت اتے پاکستان پیپلز پارٹی (پی پی پی) دا مشترکہ وفد جمعے کوں پی ٹی آئی قیادت نال ملاقات کریسی اتے موجودہ سیاسی صورتحال تے مذاکرات کریسی۔ ایں مشترکہ وفد اچ محسن نقوی، رانا ثناء اللہ، امیر مقام تے پیپلز پارٹی دی رہنما شیری رحمان، سید نوید قمر اتے اعجاز جکھرانی شریک ہوسن۔