پاکستان تے بحرین دا تجارت تے سرمایہ کاری سمیت مختلف شعبیاں اچ ݙوپاسہ تعاون کوں ٻیا ودھاوݨ تے اتفاق، نائب وزیراعظم تے بحرین دے وزیرِ خارجہ دی مشترکہ پریس کانفرنس

اسلام آباد۔8 اکتوبر (اے پی پی) نائب وزیراعظم تے وزیرِ خارجہ سینیٹر محمد اسحاق ڈار آکھیا جو پاکستان تے بحرین تجارت و سرمایہ کاری، صنعتی تعاون، زراعت و غذائی تحفظ، ہنرمندی، اعلیٰ تعلیم، انفارمیشن ٹیکنالوجی، لاجسٹکس تے بحری امور سمیت مختلف شعبیاں اچ ݙوپاسہ تعاون کوں ٻیا مضبوط بݨاوݨ تے اتفاق کیتے، جݙانجو ݙوہائیں ملکاں خلیج تعاون کونسل تے پاکستان وچال آزاد تجارتی معاہدے کوں حتمی شکل ݙیوݨ دے عزم دا وی اظہار کیتے۔ بحرین دے وزیرِ خارجہ ڈاکٹر عبداللطیف بن راشد الزیانی آکھیا جو پاکستان تے بحرین وچال تعلقات انتہائی واضح تے مخلصانہ نوعیت دے ہن تے ہݨ ݙوہائیں ملکاں دی توجہ آپݨے مضبوط تعلقات کوں ٻیا عملی نتائج اچ تبدیل کرݨ تے مستقبل اچ تعاون دے ٻئے مواقع ڳولݨ تے اے۔ پاکستان بحرین مشترکہ وزارتی کمیشن دے تریجھے اجلاس دے اختتام تے بحرین دے وزیرِ خارجہ ڈاکٹر عبداللطیف بن راشد الزیانی دے نال پریس کانفرنس نال خطاب کریندے ہوئیں محمد اسحاق ڈار آکھیا جو اجلاس انتہائی دوستانہ تے تعمیری ماحول اچ منعقد تھیا جیندے اچ پاکستان تے بحرین وچال دیرینہ دوستی، برادرانہ تعلقات تے آپسی اعتماد دی عکاسی تھئی۔ انہاں آکھیا جو ݙوہائیں ملکاں وچال سفارتی تعلقات دے قیام دی 50ویں سالڳنڈ٘ھ اے تے ایں موقع تے ݙوپاسہ تعاون کوں ٻیا مضبوط بݨاوݨ دے عزم دا اعادہ کیتا ڳئے۔ سینیٹر اسحاق ڈار ݙسایا جو مشترکہ وزارتی کمیشن دے تریجھے اجلاس دا پروٹوکول طے پا ڳئے جیڑھا آپسی دلچسپی دے شعبیاں اچ تعاون کوں ٻیا مضبوط تے وسعت ݙیوݨ دے مشترکہ عزم دی عکاسی کریندے۔ انہاں آکھیا جو اجلاس دا اہم نتیجہ کئی مشترکہ ورکنگ گروپس کوں فعال بݨاوݨ اے، جیڑھے باقاعدہ رابطے تے مشترکہ وزارتی کمیشن دے فیصلیاں تے مؤثر عملدرآمد یقینی بݨاوݨ اچ مدد ݙیسن۔ نائب وزیراعظم آکھیا جو ݙوہائیں ملکاں تجارت تے سرمایہ کاری دے فروغ، صنعتی تعاون، زراعت تے غذائی تحفظ، ہنرمندی دی ترقی، اعلیٰ تعلیم، انفارمیشن ٹیکنالوجی، لاجسٹکس تے بحری امور سمیت متعدد شعبیاں اچ تعاون ودھاوݨ تے اتفاق کیتے۔ انہاں ݙوہائیں ملکاں دی کاروباری برادریاں وچال قریبی رابطیاں دا خیرمقدم کریندیں ہوئیں آکھیا جو ایں شعبے اچ مزید تعاون کوں فروغ ݙتا ویسے۔ سینیٹر اسحاق ڈار بحرین اچ پاکستانی کمیونٹی دی قابلِ قدر خدمات کوں سراہندے ہوئیں آکھیا جو پاکستانی برادری ݙوہائیں برادر ملکاں دے درمیان ہک مضبوط پل دا کردار ادا کریندی پئی اے، لیبر موبیلٹی، پیشہ ورانہ تربیت تے انسانی وسائل دی ترقی دے شعبیاں اچ تعاون مضبوط بݨاوݨ دے عزم دا اعادہ کیتا ڳئے تانجو ہنرمند پاکستانی پیشہ ور افراد تے کارکنوں کیتے نویں مواقع پیدا کیتے ون٘ڄ سڳن۔ نائب وزیراعظم آکھیا جو اجلاس اچ خلیج دی بدلدی تھئی صورتحال تے وی ڳالھ مہاڑ کیتی ویسی اتے مسلسل کشیدگی اچ ڳھٹکی، مذاکرات تے سفارت کاری دی اہمیت تے زور ݙتا ڳیا۔ انہاں آکھیا جو آبنائے ہرمز تے باب المندب دے ذریعے محفوظ تے آزادانہ آمدورفت یقینی بݨاوݨ ضروری اے کیونجو انہاں آبی رستیاں دی علاقائی تے عالمی غذائی تے توانائی سلامتی دے حوالے نال اہمیت اے۔ سینیٹر اسحاق ڈار آکھیا جو پاکستان خطے اچ امن تے استحکام کیتے سفارتی کوشساں دی حمایت اچ تعمیری کردار ادا کرݨ کیتے پرعزم اے۔ انہاں فلسطین دی سنگین صورتحال تے وی ڳالھ مہاڑ دا ذکر کریندے ہوئیں آکھیا جو پاکستان فلسطینی عوام تے انہاں دے ناقابلِ تنسیخ حقوق کیتے آپݨی اصولی حمایت دا اعادہ کیتے۔ انہاں آکھیا جو غیر قانونی بستیوں دی مسلسل توسیع تے القدس الشریف دی حیثیت تبدیل کرݨ دی کوشساں تے تشویش دا اظہار کیتا ڳیا جݙانجو غزہ دے عوام تئیں بلا رکاوٹ انسانی امداد دی فوری فراہمی دی ضرورت تے زور ݙتا ڳیا۔ نائب وزیراعظم آکھیا جو پاکستان متعلقہ اقوامِ متحدہ دی قرارداداں دے مطابق منصفانہ تے دیرپا حل کیتے آپݨی حمایت دا وی اعادہ کیتا۔ انہاں جنوبی ایشیا دی صورتحال، افغانستان تے سندھ طاس معاہدے سمیت مختلف امور تے وی ڳالھ مہاڑ دا ذکر کیتا۔ سینیٹر اسحاق ڈار آکھیا جو پاکستان ایں ڳالھ دی ضرورت تے زور ݙتا جو افغان سرزمین پاکستان دے خلاف استعمال نہ تھیوے۔ سندھ طاس معاہدے دے حوالے نال نائب وزیراعظم آکھیا جو بھارت ولوں معاہدے کوں یکطرفہ طور تے معطل کرݨ بین الاقوامی قانون دی سنگین خلاف ورزی اتے مشترکہ آبی وسائل کوں ہتھیار دے طور تے استعمال کرݨ دی خطرناک کوشش اے، ایجھا اقدام پاکستان دے 25 کروڑ عوام دی پاݨی، غذائی تے توانائی دی سلامتی کوں خطرے اچ سٹیندے۔ نائب وزیراعظم بحرین دے وزیرِ خارجہ تے انہاں دے وفد دا مشترکہ وزارتی کمیشن دے اجلاس دی کامیابی اچ تعمیری شرکت تے قیمتی کردار تے شکریہ ادا کیتا۔ انہاں آکھیا جو پاکستان چوتھے مشترکہ وزارتی کمیشن دے اجلاس دی میزبانی بحرین اچ تھیوݨ دا منتظر اے اتے ایں حوالے نال اے عزم کیتا ڳئے جو آئندہ اجلاس موجودہ اجلاس وانگوں پنج سال دے وقفے دے بعد نئی بلکہ 2027ء اچ 365 ݙینھاں دے اندر کیتا ویسے۔ انہاں آکھیا جو پاکستان تے بحرین دی دوستی مضبوط تے مستقبل تے مرکوز اے، ݙوہائیں برادر ملک بین الاقوامی فورماں تے ہک ٻئے دے نال تعاون کریندن تے جتھاں وی موقع ملدے آپسی رابطے جاری رکھیندن۔ سینیٹر اسحاق ڈار آکھیا جو ݙوہائیں ملک مشترکہ طور تے ٻئے خوشحال مستقبل دی تعمیر تے تجارت تے اقتصادی تعلقات کوں نویاں بلندیاں تئیں گھن ون٘ڄݨ کیتے پرعزم ہن۔ ایں موقع تے بحرین دے وزیرِ خارجہ ڈاکٹر عبداللطیف بن راشد الزیانی آکھیا جو پاکستان تے بحرین وچال سفارتی تعلقات دے قیام دے 55 سال مکمل تھیوݨ آلے ہن تے ݙوہائیں ملکاں وچال برادرانہ تعلقات، اعتماد تے یکجہتی کوں حالیہ اعلیٰ سطح دے دوریاں نال مزید تقویت ملی اے۔ انہاں وزیراعظم محمد شہباز شریف دے نومبر 2025ء تے صدرِ مملکت آصف علی زرداری دے جنوری 2026ء اچ بحرین دے دوریاں دا حوالہ ݙیندے ہوئیں آکھیا جو ݙوہائیں ملکاں دے تعلقات اچ نئی رفتار پیدا تھئی اے۔ بحرینی وزیرِ خارجہ اسلام آباد اچ کنگ حمد یونیورسٹی فار نرسنگ اینڈ الائیڈ میڈیکل سائنسز تے بحرین اچ ہک لکھ 40 ہزار توں ودھ پاکستانیاں دی خدمات کوں ݙوہائیں ملکاں وچال مضبوط رابطیاں دی مثال قرار ݙتا۔ انہاں آکھیا جو ݙوہائیں ملکاں مشترکہ وزارتی کمیشن دے تریجھی اجلاس دے متفقہ منٹس تے دستخط کیتے ہن جیندے اچ 15 توں زائد شعبیاں دا احاطہ کیتا ڳئے۔ انہاں ݙسایا جو تجارت تے سرمایہ کاری دے حآلے نال مشترکہ ورکنگ گروپ قائم کرݨ، آئندہ مہینے تیل، گیس تے معدنیات نال متعلق توانائی دے مشترکہ ورکنگ گروپ دا اجلاس منعقد کرݨ تے غذائی تحفظ، انفارمیشن ٹیکنالوجی، قانون نافذ کرݨ آلے اداریاں، میڈیا، لیبر موبیلٹی، صحت، تعلیم، ثقافت تے کھیڈ سمیت مختلف شعبیاں اچ تعاون اگوں ودھاوݨ تے اتفاق کیتا ڳئے ۔ بحرینی وزیرِ خارجہ آکھیا جو ݙوہائیں ملکاں جی سی سی تے پاکستان وچال آزاد تجارتی معاہدے کوں حتمی شکل ݙیوݨ دے عزم دا وی اظہار کیتے تے آئندہ سال 2027ء اچ بحرین اچ تھیوݨ آلے چوتھے مشترکہ وزارتی کمیشن دے اجلاس اچ ایں حوالے نال پیشرفت دا جائزہ گھدا ویسے۔ انہاں جاری علاقائی بحران دے دوران پاکستان دے اصولی موقف کوں سراہندے ہوئیں سلامتی کونسل دی قرارداد 2817 کیتے پاکستان دی حمایت تے ٻیاں شراکت داراں دے نال رَل تے امریکا تے ایران وچال مذاکرات تے کشیدگی اچ ڳھٹکی کیتے پاکستان دی کوششاں، بشمول اسلام آباد مذاکرات دی میزبانی، کوں سراہیا۔ بحرینی وزیرِ خارجہ 6 تے 7 اکتوبر کوں ابہا انٹرنیشنل ایئرپورٹ تے کنگ خالد انٹرنیشنل ایئرپورٹ تے دہشت گرد حملیاں دی شدید مذمت کریندیں ہوئیں آکھیا جو انہاں حملیاں اچ شہری تے مقامی افراد جاں بحق تے زخمی تھئے۔ انہاں سعودی عرب اچ حوثی ملیشیا دی جانب توں شہریاں تے شہری تنصیبات تے حملیاں تے مکہ مکرمہ تے مدینہ منورہ جیہڑے مقدس ترین مقامات تے حملیاں دی وی مذمت کیتی۔ انہاں آکھیا جو ہوائی اݙیاں تے شہری تنصیبات کوں نشانہ بݨاوݨ بین الاقوامی قانون تے بین الاقوامی انسانی قانون دی کھلی خلاف ورزی اے۔ہک سوال دے جواب اچ نائب وزیراعظم اسحاق ڈار آکھیا جو ݙوہائیں ملک بین الاقوامی فورماں تے ہک ٻئے دے نال رابطے اچ راہندے، مشاورت کریندے تے آپݨے خیالات تے معاملیاں دا تبادلہ کریندن۔ نائب وزیراعظم آکھیا جو بحرین دے وزیرِ خارجہ 2025ء دی پاک بھارت جنگ تے پاکستان ولوں امریکا تے ایران دے درمیان ثالثی دے دوران مسلسل رابطہ رکھا، پیشرفت کے بارے اچ دریافت کیتا تے آپݨے خیالات دا اظہار کیتا، جیندے تے وہ انہاں دے شکر گزار ہن۔ ہک سوال تے ڈاکٹر عبداللطیف بن راشد الزیانی آکھیا جو پاکستان تے بحرین وچال تعلقات انتہائی واضح تے مخلصانہ نوعیت دے ہن، ݙوہائیں ملک ہک ٻئے دا احترام کریندن تے ایہو ݙو ریاستاں وچال تعلقات دی بنیادی خصوصیت اے۔ انہاں آکھیا جو بحرین اچ ہک لکھ 40 ہزار توں زائد پاکستانی مقیم ہن جیڑھے بحرینی شہریاں دے نال رل تے ملک دی ترقی اچ آپݨا کردار ادا کریندے پئن تے بحرین انہاں دی خدمات کوں قدر دی نگاہ نال ݙیکھدے۔ بحرینی وزیرِ خارجہ آکھیا جو پاکستان تے بحرین دے تعلقات مسلسل مضبوط تے مستحکم تھئے ہن، ہݨ ݙوہائیں ملکاں دی توجہ آپݨے مضبوط تعلقات کوں مزید عملی نتائج اچ تبدیل کرݨ تے مستقبل اچ تعاون دے ٻئے مواقع ڳولݨ تے اے۔