چیئرمین سینیٹ دا 8 اکتوبر 2005ء دے زلزلے دے شہدا کوں خراجِ عقیدت

اسلام آباد۔8 اکتوبر (اے پی پی) چیئرمین سینیٹ سید یوسف رضا گیلانی 8 اکتوبر 2005ء دے تباہ کن زلزلے دے شہدا دی 21ویں برسی دے موقع تے انہاں کوں خراجِ عقیدت پیش کریندیں ہوئیں متاثرہ خانداناں نال دلی ہمدردی تے یکجہتی دا اظہار کیتے۔ سینیٹ سیکرٹریٹ دے مطابق 8 اکتوبر 2005ء دے زلزلہ متاثرین دی 21ویں برسی دے موقع تے آپݨے سنیھے اچ چیئرمین سینیٹ زلزلہ شہدا دے درجات دی بلندی تے سوگوار خانداناں کیتے صبرِ جمیل دی دعا کیتی۔ چیئرمین سینیٹ پاک فوج، ریسکیو اداریاں، رضاکاراں تے امدادی کارکنیاں دی خدمات کوں وی خراجِ تحسین پیش کیتا۔ انہاں آکھیا جو 2005ء دے زلزلے دے تجربے توں قدرتی آفات نال نبڑݨ کیتے اہم اسباق حاصل تھئے، قدرتی آفات کوں روکیا نئی ونڄ سڳدا تاہم بروقت وارننگ، مؤثر ادارہ جاتی رابطے، بہتر ہنگامی ردِعمل تے مضبوط ڈیزاسٹر مینجمنٹ دے ذریعے جانی تے مالی نقصانات کوں گھٹ کیتا ونڄ سڳدے۔ سید یوسف رضا گیلانی آکھیا جو مشکل دی ہر گھڑی اچ قومی یکجہتی، اپسی تعاون تے اجتماعی ذمہ داری دے جذبے کوں برقرار رکھݨا ہوسی۔