وزیراعظم شہباز شریف نال بحرین دے وزیرِ خارجہ ڈاکٹر عبداللطیف بن راشد الزیانی دی ملاقات

اسلام آباد۔8 اکتوبر(اے پی پی)وزیراعظم محمد شہباز شریف پاکستان اتے بحرین دے دیرینہ اتے برادرانہ تعلقات کوں سراہندے تجارت، سرمایہ کاری، توانائی اتے افرادی قوت دی استعداد کار ودھاوݨ سودھا مختلف شعبیاں اچ تعاون ٻیا ودھاوݨ دا پاکستان دا عزم دوہرائے۔ وزیراعظم محمد شہباز شریف نال بحرین دے وزیرِ خارجہ ڈاکٹر عبداللطیف بن راشد الزیانی ملین۔ او پاکستان دے نائب وزیراعظم و وزیرِ خارجہ نال پاکستان اتے بحرین دے مشترکہ وزارتی کمیشن (جے ایم سی) دے تریجھے اجلاس دی مشترکہ صدارت کیتے پاکستان آئن۔

وزیراعظم آفس دے میڈیا ونگ دے مطابق وزیراعظم بحرینی وزیرِ خارجہ دا خیرمقدم کریندے ہوئیں بحرین دی قیادت اتے عوام کیتے نیک خواہشات پچائن۔ انہاں پاکستان اتے بحرین دے دیرینہ اتے برادرانہ تعلقات کوں سراہندے آکھیا جو ݙوہائیں ملکاں دے تعلقات مشترکہ اقدار، باہمی اعتماد اتے عوامی رابطیاں تے قائم ہین۔ وزیراعظم پاکستان اتے بحرین دے ݙوطرفہ تعلقات اچ مثبت پیش رفت تے اطمینان کیتے اتے تجارت، سرمایہ کاری، توانائی اتے افرادی قوت دی استعداد کار ودھاوݨ سودھا مختلف شعبیاں اچ تعاون ٻیا ودھاوݨ دا پاکستان دا عزم دوہرایا۔ وزیرِ خارجہ عبداللطیف الزیانی بحرین دی قیادت ولوں وزیراعظم محمد شہباز شریف کیتے نیک خواہشات اتے خیرسگالی دا سنیہا پچایا۔ انہاں باہمی مفاد دے مختلف شعبیاں اچ ݙوطرفہ تعاون ٻیا مضبوط بݨاوݨ دا بحرین دا عزم وی دوہرایا۔ فریقین علاقائی اتے عالمی صورتحال تے الیندے باہمی دلچسپی دے امور تے مسلسل مشاورت اتے رابطہ برقرار رکھݨ تے زور ݙتے۔

وزیرِ خارجہ عبداللطیف الزیانی خطے اچ امن و استحکام کیتے پاکستان دے تعمیری کردار اتے ثالثی کوششاں کوں سراہیا۔ وزیراعظم آکھیا جو پاکستان اتے بحرین دے مشترکہ وزارتی کمیشن دا تریجھا اجلاس ݙوہائیں ملکاں دا تعاون ٻیا ودھاوݨ کیتے اہم کردار ادا کریسی۔