وفاقی وزیرِ خزانہ محمد اورنگزیب بورورز پلیٹ فارم دی گورننگ کونسل دی چیئرمین شپ سنبھال ڳھدی، قرض کوں ترقی کیتے موثر ذریعہ بݨاوݨ تے زور

بنکاک۔12 اکتوبر (اے پی پی) وفاقی وزیرِ خزانہ و محصولات سینیٹر محمد اورنگزیب بنکاک اچ عالمی بینک گروپ تے آئی ایم ایف دے سالانہ اجلاساں دے موقع تے پاکستان دی طرفوں بورورز پلیٹ فارم دی گورننگ کونسل دی چیئرمین شپ سنبھال ڳھدی۔ وزارتِ خزانہ موجب ایں موقع تے ڳالھ کریندے وزیرِ خزانہ پلیٹ فارم کوں فعال بݨاوݨ اچ مصر دی قیادت، رکن ملکاں تے سیکرٹریٹ دیاں کوششاں دی تعریف کیتی۔وزیرِ خزانہ زور ݙتا جو اجتماعی سودے بازی دا فورم بݨݨ یا بحراناں نال نبڑݨ دے طریقۂ کار دے طور تے کم کرݨ دی بجائے بورورز پلیٹ فارم دا مقصد سانجھے تجربیں توں سکھݨ تے تکنیکی تعاون کوں ودھارا ݙیوݨا اے۔ انہاں 2026-27ء دے عملی منصوبے دے تحت پاکستان دی ترجیحات تے روشنی پاتی جنہاں اچ قرض دے انتظام دے طریقۂ کار کوں تکڑا بݨاوݨ، اصلاحات دے تجربیں دا تبادلہ تے ترقیاتی مالیات کیتے جدید ذرائع تلاش کرݨ شامل ہن۔انہاں ایں عزم دا اعادہ کیتا جو پاکستان عملی اقدامات دے نفاذ تے قابلِ پیمائش نتیجے دے حصول کیتے پرعزم اے تے ایں ڳالھ تے زور ݙتا جو قرض نمو دی رستے اچ رکاوٹ بݨݨ دی بجائے ترقی دا ذریعہ ہووݨا چاہیدے۔ اختتامی کلمات اچ وزیرِ خزانہ پلیٹ فارم دیاں ادارہ جاتی بنیاداں، انتظامی ڈھانچے تے مشترکہ عملی پروگرام دی تشکیل اچ تکھی رفتار پیشرفت دا خیرمقدم کیتا تے ممکنہ رکن ملکاں دی ودھدی دلچسپی دی وی تعریف کیتی ۔اجلاس دے بعد انہاں پریس کانفرنس نال وی خطاب کیتا۔ایں توں انڄ وزیرِ خزانہ اقوامِ متحدہ دی انڈر سیکرٹری جنرل تے اقوامِ متحدہ دے اقتصادی و سماجی کمیشن ایشیا و بحرالکاہل دی ایگزیکٹو سیکرٹری آرمیدا سالسیا علی سجہبانا نال ملاقات کیتی۔ ملاقات اچ پاکستان دی معاشی ترجیحات تے تعاون دے ممکنہ موقعیں تے ڳالھ مہاڑ کیتی۔ وزیرِ خزانہ معاشی استحکام دے حصول اچ تھیوݨ آلی پیشرفت دا ݙسایا تے ڈھانچہ جاتی اصلاحات تے برآمدات تے مبنی پائیدار ترقی دے ذریعے انہاں کامیابیاں کوں برقرار رکھݨ دی اہمیت تے زور ݙتا۔