وزیراعظم محمد شہباز شریف دی چھوٹے تے درمیانے درجے دے کاروباری لوکاں کیتے قرضیں دی مجموعی مالیت 2028ء تئیں 1.1 ٹریلین روپے توں ودھا تے 2.2 ٹریلین روپے کرݨ دی ہدایت

اسلام آباد۔12 اکتوبر (اے پی پی) وزیراعظم محمد شہباز شریف چھوٹے تے درمیانے درجے دے کاروباری لوکاں کیتے قرضیں دی مجموعی مالیت 2028ء تئیں 1.1 ٹریلین روپے توں ودھا تے 2.2 ٹریلین روپے کرݨ دی ہدایت کریندے آکھیے جو سمیڈا اچ جاری اصلاحات دا محور چھوٹے تے درمیانے درجے دے کاروباری لوکاں کوں بااختیار بݨاوݨا اے، پسماندہ علاقیں نال تعلق رکھݨ آلے لوکاں کوں مختلف شعبیں اچ کاروبار قائم کرݨ دے موقع ݙیوݨ انہاں علاقیں دی ترقی تے خوشحالی کیتے مفید ثابت تھیسی۔وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف دی زیرِ صدارت سمیڈا دے حوالے نال اجلاس منعقد تھیا۔ وزیراعظم محمد شہباز شریف آکھیا جو کاروباری طبقہ کہیں وی وی ملک دی معیشت اچ ریڑھ دی ہݙی دی حیثیت رکھیندے جݙاں جو پاکستان اچ چھوٹے تے درمیانے درجے دے کاروبار (ایس ایم ایز) اچ ملکی معیشت کوں ودھارا ݙیوݨ دی بے پناہ صلاحیت موجود اے۔ انہاں آکھیا جو سمیڈا اچ جاری اصلاحات دا محور چھوٹے تے درمیانے درجے دے کاروباری لوکاں کوں بااختیار بݨاوݨا اے۔ وزیراعظم آکھیا جو پسماندہ علاقیں دے عوام کوں بااختیار بݨاوݨ نال انہاں علاقیں توں وݙے شہراں دے پاسے نقل مکانی گھٹ تھیسی تے ملک دی مجموعی ترقی کوں ودھارا ملسی۔ پسماندہ علاقیں نال تعلق رکھݨ آلے لوکاں کوں مختلف شعبیں اچ کاروبار کرݨ دے موقع ݙیوݨ انہاں علاقیں دی ترقی تے خوشحالی کیتے مفید ثابت تھیسی۔وزیراعظم ہدایت کیتی جو سمیڈا ودھ توں ودھ لوکاں کوں کاروبار کیتے قرضیں دے حصول دے طریقۂ کار دا ݙساوݨ کیتے جامع لائحہ عمل بݨاوے تے عوام اچ کاروباری سرگرمیاں دے ودھارے کیتے شعور اجاگر کرݨ کیتے موثر اقدامات کرے۔ انہاں ہدایت کیتی جو مختلف شعبیں اچ چھوٹے تے درمیانے درجے دے کاروبار دے قیام کیتے فیزیبلٹی سٹڈیز شعبہ جات دے ماہرین توں تیار کروائیاں ونڄن تے انہاں کوں مقامی زباناں اچ وی دستیاب بݨایا ونڄے تاں جو ملک  دے خواہشمند کاروباری لوک انہاں توں بھرپورفیدہ چاسڳن۔ وزیراعظم چھوٹے تے درمیانے درجے دے کاروباری لوکاں کیتے قرضیں دی مجموعی مالیت 2028ء تئیں 1.1 ٹریلین روپے توں ودھا تے 2.2 ٹریلین روپے کرݨ دی ہدایت کیتی۔اجلاس اچ وزیراعظم کوں سمیڈا اچ جاری اصلاحات تے چھوٹے و درمیانے درجے دے کاروبار دے ودھارے کیتے چاتے ونجݨ آلے اقدامات تے بریفنگ ݙتی ڳئی۔ بریفنگ اچ ݙسایا ڳیا جو سمیڈا کوں ہک مرکزی پلیٹ فارم اچ تبدیل کیتا ویندا پئے جیڑھا جو چھوٹے تے درمیانے درجے دے کاروبار قائم کرݨ دے خواہشمند لوکاں کوں تربیت ݙیوݨ تے کاروبار کیتے مالی معاونت دے حصول دی غرض نال بینکاں نال رابطے اچ سہولت ݙیسی۔ بریفنگ اچ ݙسایا ڳیا جو ایس ایم ای شعبے نال جڑئے لوکاں تئیں موثر رسائی یقینی بݨاوݨ کیتے ملک بھر اچ سمیڈا دے دفتر قائم کیتے ویندے پئن۔ شہریاں دی سہولت کیتے مصنوعی ذہانت (اے آئی) تے مبنی ہیلپ لائن قائم کیتی ویندی پئی اے جیندے ذریعے لوکاں کوں مقامی زباناں اچ معلومات تے رہنمائی ݙتی ویسے۔ بریفنگ اچ ݙسایا ڳیا جو عالمی ای کامرس کمپنی علی بابا تے سمیڈا وچال مفاہمت دی یادداشت تے دستخط تھی چکئن جیندے تحت ݙو سال دے عرصے اچ ݙاہ ہزار چھوٹے تے درمیانے درجے دے کاروباری اداریں (ایس ایم ایز) کوں تربیت ݙتی ویسے۔ ایس ایم ای ڈیجیٹل پورٹل کوں مزید موثر تے کاروباری لوکاں کیتے سہل بݨاوݨ کیتے اصلاحات جاری ہن۔اجلاس اچ وفاقی وزراء رانا تنویر حسین، جام کمال خان، ڈاکٹر مصدق مسعود ملک، احد خان چیمہ، عطاء اللہ تارڑ تے چوہدری سالک حسین، وزیرِ مملکت خزانہ بلال اظہر کیانی، وزیراعظم دے مشیر ہارون اختر، چیئرمین پرائم منسٹر یوتھ پروگرام رانا مشہود احمد خان تے متعلقہ اداریں دے اعلیٰ حکام شرکت کیتی۔