صدرِ مملکت آصف علی زرداری نال ناروے، آذربائیجان تے سوئٹزرلینڈ دے نامزد سفیراں دی ملاقات، اسنادِ سفارت پیش، ݙوطرفہ تعلقات مزید تکڑے بݨاوݨ تے ڳالھ مہاڑ

اسلام آباد۔12 اکتوبر (اے پی پی) صدرِ مملکت آصف علی زرداری کوں ناروے، آذربائیجان تے سوئٹزرلینڈ دے نامزد سفیراں ایوانِ صدر اچ اپݨی سفارتی سنداں پیش کیتیاں۔ صدرِ مملکت ترائی سفیراں کوں انہاں دی تقرری تے مبارخ ݙتی تے پاکستان اچ انہاں دی سفارتی ذمہ واریاں دے کامیاب دور کیتے نیک خواہشات دا اظہار کیتا۔ ایوانِ صدر دے میڈیا ونگ توں جاری بیان موجب ملاقاتاں دے دوران ݙوطرفہ تعلقات کوں مزید تکڑا بݨاوݨ دے امکانات تے ڳالھ مہاڑ کیتی ڳئی جیندے اچ بالخصوص اقتصادی تعاون، تجارت تے سرمایہ کاری سودھے سانجھی دلچسپی دے ٻئے شعبیں تے توجہ ݙتی ڳئی۔

ناروے دے نامزد سفیر سگوالڈ ہائوگ نال ملاقات اچ صدرِ مملکت پاکستان تے ناروے وچال دوستانہ تعلقات کوں مزید مستحکم بݨاوݨ دے عزم دا اعادہ کیتا۔ انہاں 2022ء اچ پاکستان اچ تباہ کن چھل دے دوران ناروے دی امداد دی تعریف کیتی تے اپریل 2026ء اچ موسمیاتی تعاون متعلق ݙوہیں ملکاں وچال مفاہمتی یادداشت تے دستخط دا خیرمقدم کیتا۔ صدرِ مملکت قابلِ تجدید توانائی، بحری امور، ٹیکنالوجی، تجارت تے سرمایہ کاری دے شعبیں اچ تعاون دے موقعیں کوں اجاگر کیتا۔ انہاں ݙوہیں ملکاں دے تعلقات دے ودھارے اچ پاکستانی تارکینِ وطن دے کردار دی وی تعریف کیتی۔

آذربائیجان دے نامزد سفیر عرفان شاکراوغلو دائودوف نال ڳالھ کریندے صدرِ مملکت پاکستان تے آذربائیجان وچال نیڑے تے برادرانہ تعلقات دا اعادہ کیتا۔ انہاں تکڑے سیاسی رابطیں کوں تجارت تے سرمایہ کاری اچ ودھارے اچ بدالݨ دی لوڑھ تے زور ݙتا۔ صدرِ مملکت توانائی، علاقائی رابطیں تے دفاع دے شعبیں اچ تعاون دے وسیع امکانات کوں اجاگر کیتا، دفاعی صنعتی تعاون اچ پیشرفت دا خیرمقدم کیتا تے آکھیا جو ݙوہیں ملکاں وچال براہِ راست فضائی

رابطے سیاحت تے عوامی سطح تے رابطیں دے ودھارے اچ اہم کردار ادا کریندے پئن۔سوئٹزرلینڈ دے نامزد سفیر اسٹیفن لائورینٹ رے نال ملاقات اچ صدرِ مملکت ثالثی تے امن دیاں کوششاں اچ سوئٹزرلینڈ دے کردار دی تعریف کیتی جیندے اچ برگن سٹاک اچ امریکہ تے ایران وچال تکنیکی مذاکرات اچ سہولت کاری وی شامل اے۔ صدرِ مملکت علاقائی امن کیتے مسلسل تعاون دی اہمیت تے زور ݙتا تے تجارت، سرمایہ کاری، ادویہ سازی، انفارمیشن ٹیکنالوجی، سائبر سکیورٹی، قابلِ تجدید توانائی، آبی انتظام تے سیاحت دے شعبیں اچ تعاون دے موقعیں کوں اجاگر کیتا۔انھاں ملاقاتاں دے دوران سینیٹر شیری رحمان، سینیٹر سلیم مانڈوی والا تے سیکرٹری خارجہ عاصم افتخار احمد وی موجود ہن۔