وفاقی حکومت صوبیں کوں زراعت دی ترقی کیتے ہر قسم دا تعاون ݙیسی، کݨک وافر مقدارموجود اے، ذخیرہ اندوزی کرݨ آلیں کوں کہیں قسم دی رعایت نہ ݙتی ویسے، وزیراعظم محمد شہباز شریف

اسلام آباد۔13 اکتوبر (اے پی پی) وزیراعظم محمد شہباز شریف کساناں کوں گھٹ لاڳت تے کھاد، معیاری بج، جدید مشینری تے پاݨی دے بہتر استعمال کیتے آلات و تکنیکی صلاحیتاں ݙیوݨ کوں اولین ترجیح قرار ݙیندے آکھیے جو وفاقی حکومت صوبیں کوں زراعت دی ترقی کیتے ہر قسم دا تعاون ݙیسی، کݨک وافر مقدار اچ موجود اے، ذخیرہ اندوزی کرݨ آلیں کوں کہیں قسم دی رعایت نہ ݙتی ویسے، صوبیں دے نال مشاورت مکمل کرتے وقتی کݨک دی قیمت دا اعلان کیتا ویسے۔ وزیراعظم دفتردے میڈیا ونگ توں جاری بیان موجب وزیراعظم محمد شہباز شریف دی زیرِ صدارت قومی زرعی و غذائی تحفظ کونسل دا پہلا اجلاس منعقد تھیا۔ایں موقع تے ڳالھ کریندے وزیراعظم شہباز شریف آکھیا جو زراعت ملکی معیشت اچ ریڑھ دی ہݙی دی حیثیت رکھیندی اے، زراعت پاکستان دی معیشت کوں قلیل مدت اچ ترقی دے رستے تے ٹورݨ دی استعداد رکھیندی اے۔ انہاں آکھیا جو وزیراعلیٰ پنجاب کساناں دی ترقی، ایکوا کلچر، شرمپ فارمنگ تے کسان کارڈ دے ذریعے کساناں کوں براہِ راست سبسڈی ݙیوݨ جیھے احسن اقدامات کریندیاں پئن، وزیراعلیٰ سندھ کساناں دی ترقی تے انہاں کوں سہولتاں ݙیوݨ کیتے ݙینھ رات محنت کریندے پئن۔وزیراعظم آکھیا جو لائیو سٹاک دا شعبہ وی ملکی برآمدات ودھاوݨ دی وسیع استعداد رکھیندے، پاکستانی حلال گوشت دی برآمدات اچ ودھارے کیتے اقدامات کریندے پیوں۔ وزیراعظم آکھیا جو وفاقی حکومت صوبیں کوں زراعت دی ترقی کیتے ہر قسم دا تعاون ݙیسی، کساناں کوں گھٹ لاڳت تے کھاد، معیاری بج، جدید مشینری تے پاݨی دے بہتر استعمال کیتے آلات و تکنیکی صلاحیتاں ݙیوݨ اولین ترجیح اے، کساناں بالخصوص چھوٹے و درمیانے درجے دے کساناں کوں انہاں دی فصل دی صحیح قیمت ݙیوݨ ترجیح اے۔انہاں آکھیا جو ملکی ضرورتاں کوں پورا کرݨ کیتے کݨک وافر مقدار اچ موجود اے، کݨک دی ذخیرہ اندوزی کرݨ آلیں کوں کہیں قسم دی رعایت نہ ݙتی ویسے، کݨک رہاوݨ توں پہلے ایں دی صحیح قیمت دا تعین ضروری اے تاں جو کساناں کوں انہاں دی محنت دا مناسب معاوضہ ملے، چاہندوں کساناں کوں کݨک دی صحیح قیمت تے صارف کوں سستی کݨک ملے۔ انہاں آکھیا جو کݨک دی قیمت دے حوالے نال فیصلہ صوبیں دی مشاورت دے نال کیتا ویسے، صوبیں دے نال مشاورت مکمل کرتے وقتی کݨک دی قیمت دا اعلان کیتا ویسے۔اجلاس اچ وزیراعلیٰ پنجاب تے وزیرِ خوراک سندھ پنجاب تے سندھ اچ کساناں دی ترقی کیتے صوبائی حکومتاں دے اقدامات تے روشنی پاتی۔ اجلاس اچ بلوچستان، خیبر پختونخوا، آزاد جموں و کشمیر تے گلگت بلتستان اچ زراعت دی ترقی کیتے اقدامات تے وی بریفنگ ݙتی ڳئی۔