قلات تے پسنی اچ سکیورٹی فورسز دی کارروائیاں اچ فتنہ الہندوستان دے 4 دہشت گرد ہلاک، میجر وجاہت وحید شہید تھی ڳئے: آئی ایس پی آر

راولپنڈی۔19 اکتوبر (اے پی پی) سکیورٹی فورسز بلوچستان دے اضلاع قلات تے گوادر اچ مؤثر انٹیلی جنس بیسڈ آپریشنز دے دوران بھارتی سرپرستی اچ کام کرݨ آلے گروہ ’’فتنہ الہندوستان‘‘ دے 4 دہشت گرداں کوں جہنم واصل کر ݙتے جݙانجو پسنی اچ آپریشن دے دوران دیسی ساختہ بم (آئی ای ڈی) دے دھماکے اچ دستے دی قیادت کرݨ آلے میجر وجاہت وحید فرض دی راہ اچ جامِ شہادت نوش کر ݙتا۔ انٹر سروسز پبلک ریلیشنز (آئی ایس پی آر) دے مطابق انٹیلی جنس ایجنسیاں ضلع گوادر دی تحصیل پسنی دے علاقے شادی کور تے ضلع قلات دے علاقے جھٹک آباد اچ بھارتی سرپرستی اچ کام کرݨ آلے ’’فتنہ الہندوستان‘‘ دی کئی پناہ گاہاں دی موجودگی دی اطلاع ݙتی جیندے توں مقامی آبادی کوں شدید خطرہ لاحق ہا۔ مقامی آبادی دے تحفظ تے علاقے کوں دہشت گرداں توں پاک کرݨ کیتے سکیورٹی فورسز انہاں علاقیاں اچ آپریشنز کریندی پئن۔ آئی ایس پی آر دے مطابق پہلے واقعے اچ 18 اکتوبر 2026ء کوں سکیورٹی فورسز ضلع قلات دے عمومی علاقے جھٹک آباد اچ انٹیلی جنس تے مبنی آپریشن کیتا۔ آپریشن دے دوران اساݙے جواناں دہشت گرداں دے ٹھکانے کوں مؤثر طریقے نال نشانہ ٻݨایا اتے شدید فائرنگ دے تبادلے دے بعد چار دہشت گرداں کوں جہنم واصل کر ݙتا۔ ایں دوران بھاری مقدار اچ اسلحہ تے گولہ بارود وی برآمد کر گھدا ڳیا۔ ݙوجھے واقعے اچ سکیورٹی فورسز ضلع گوادر دی تحصیل پسنی دے عمومی علاقے شادی کور اچ کلیئرنس آپریشنز دا سلسلہ شروع کیتا۔ انہاں اچوں ہک آپریشن دے دوران لیڈ فورس دے دستے کوں جیندے دی قیادت میجر وجاہت وحید (عمر 34 سال، رہائشی لاہور) کریندیں پئے ہن، ہک دیسی ساختہ بم نال نشانہ ٻݨایا ڳیا۔ دھرتی دے ایں بہادر سپوت میجر وجاہت وحید فرض دی راہ اچ عظیم قربانی ݙیندے ہوئیں جامِ شہادت نوش کیتا۔ علاقے اچ موجود کہیں وی ٻئے دہشت گرد دے خاتمے کیتے سینیٹائزیشن آپریشنز جاری رہسن۔ آئی ایس پی آر دا آکھݨ ہا جو نیشنل ایکشن پلان دی فیڈرل ایپکس کمیٹی دے منظور کردہ وژن ’’عزمِ استحکام‘‘ دے تحت انسدادِ دہشت گردی دی مسلسل مہم پوری قوت دے نال جاری رہسی۔ سکیورٹی فورسز تے قانون نافذ کرݨ آلے ادارے ملک توں غیر ملکی سرپرستی تے معاونت یافتہ دہشت گردی دی لعنت کوں جڑ توں اکھاڑ سٹݨ کیتے پرعزم ہن۔