وزیراعظم دی اڳواݨی اچ لائیو سٹاک شعبے اچ جاری اصلاحات بارے اعلیٰ سطح اجلاس، لائیو سٹاک اینڈ ڈیری ڈویلپمنٹ بورڈ دی تنظیمِ نو دی ہدایت

اسلام آباد۔19 اکتوبر(اے پی پی)وزیراعظم محمد شہباز شریف لائیو سٹاک اینڈ ڈیری ڈویلپمنٹ بورڈ دی تنظیمِ نو اتے لائیو سٹاک کیتے خصوصی بونڈڈ ویئر ہاؤسز اچ درآمد شدہ مویشیاں کوں ویلیو ایڈیشن اچ گھن آوݨ دی ہدایت کریندے آکھیے جو لائیو سٹاک شعبے دی ترقی کیتے نجی شعبے کوں اڳو تے ودھݨا چاہیدے۔ وزیراعظم محمد شہباز شریف دی اڳواݨی اچ لائیو سٹاک دے شعبے اچ جاری اصلاحات بارے اعلیٰ سطح اجلاس تھئے۔ وزیراعظم لائیو سٹاک اینڈ ڈیری ڈویلپمنٹ بورڈ دی تنظیمِ نو دی ہدایت کیتی۔ لائیو سٹاک اینڈ ڈیری ڈویلپمنٹ بورڈ پاکستان اچ مویشیاں دی افزائش، کھیر اتے گوشت دی پیداوار ودھاوݨ اتے لائیو سٹاک دے شعبے دی ترقی کیتے 2007ء اچ ٻݨایا ڳیا ہا۔ وزیراعظم آکھیا جو لائیو سٹاک اینڈ ڈیری ڈویلپمنٹ بورڈ اچ نجی شعبے دے ماہرین کوں رلا تے ایکوں ہک مؤثر اتے فعال ادارے اچ تبدیل کیتا ونڄے۔ انہاں لائیو سٹاک اینڈ ڈیری ڈویلپمنٹ بورڈ دی تنظیمِ نو دا پلان تیکھے پیش کرݨ اتے لائیو سٹاک کیتے خصوصی بونڈڈ ویئر ہاؤسز اچ آھن آئے ڳئے درآمد شدہ مویشیاں کوں ویلیو ایڈیشن دے عمل اچ گھن آوݨ دی ہدایت کیتی۔ وزیراعظم آکھیا جو درآمد شدہ مویشیاں توں بذریعہ ویلیو ایڈیشن گوشت تے کھیر دیاں مصنوعات برآمد کیتیاں ونڄن، لائیو سٹاک دے شعبے دی ترقی کیتے نجی شعبے کوں اڳو تے ودھݨا چاہیدے، وفاقی حکومت، مویشیاں کیتے جدید تے مؤثر ویکسین دی پیداوار دا قومی سطح دا پلانٹ اپݨے وسائل نال لیسی۔ وزیراعظم نیشنل ایگریکلچرل ریسرچ سینٹر اچ مویشیاں دی ویکسین دا پلانٹ لاوݨ دی حکمتِ عملی ہک ہفتے اچ پیش کرݨ دی ہدایت وی کیتی۔ اجلاس اچ لائیو سٹاک شعبے اچ اصلاحات اتے اایندے نال جڑیاں برآمدات ودھاوݨ کیتے اقدامات تے وی بریفنگ ݙتی ڳئی۔ اجلاس اچ وفاقی وزراء رانا تنویر حسین، احسن اقبال، اعظم نذیر تارڑ، ڈاکٹر مصدق مسعود ملک، احد خان چیمہ، جام کمال خان، وزیرِ مملکت برائے خزانہ بلال اظہر کیانی تے متعلقہ اداریاں دے اعلیٰ افسران شریک ہن۔