وزیراعظم شہباز شریف دی اڳواݨی اچ ایف بی آر دے امور بارے ہفتہ وار جائزہ اجلاس

اسلام آباد۔19 اکتوبر(اے پی پی)وزیراعظم محمد شہباز شریف ایف بی آر اچ اصلاحات دی رفتار اچ تیزی گھن آوݨ تے ٹیکس وصولی دے شعبیاں اچ فیس لیس نظام دا نفاذ تیز کرݨ دی ہدایت کریندے آکھیے جو ایف بی آر اچ اصلاحات کوں نتیجہ خیز بݨاوݨ کیتے ٹیکنالوجی، مؤثر تربیت، شفافیت اتے جوابدہی تے خصوصی توجہ ݙتی ونڄے، ایف بی آر اچ بدعنوان عناصر دے خلاف کارروائی کرݨی چاہیدی اے۔ وزیراعظم محمد شہباز شریف فیڈرل بورڈ آف ریونیو (ایف بی آر) دے امور بارے ہفتہ وار جائزہ اجلاس دی اڳواݨی کیتی۔ انہاں ایف بی آر اچ اصلاحات تیکھیاں کرݨ دی ہدایت کریندے آکھیے جو ایف بی آر اچ جاری اصلاحات دے ابتدائی نتائج حوصلہ افزا ہین، ٹیکس گیپ تے قابو پاوݨ کیتے ایف بی آر دی استعداد کار ودھائی ونڄے۔ انہاں ٹیکس وصولی دے شعبیاں اچ فیس لیس نظام دے نفاذ کوں تیز کرݨ دی ہدایت کیتی۔ وزیراعظم آکھیا جو ایف بی آر افسران دی ذمہ داری اے جو او قوم دیاں توقعات دے مطابق اپݨی کارکردگی بہتر کرن، جاری اصلاحات ریاست دے وسیع تر مفاد اچ ہن، انہاں دا عمل ہر صورت جاری رہسی۔ وزیراعظم آکھیا جو اپݨے رویے اتے کارکردگی بہتری کرݨ والے افسران اتے عملے کوں اصلاح دا موقع ݙتا ویسی ڄݙاں جو بدعنوانی اتے ناقص کارکردگی آلیاں کیتے ادارے اچ کوئی ڄاہ نا بچسی۔ اجلاس کوں ایف بی آر اچ جاری اصلاحات دی تازہ ترین پیشرفت اتے ہݨ تئیں دے نتائج دا ݙسایا ڳیا۔ اجلاس کوں ایف بی آر اچ ٹیکنالوجی، نظامِ کار اتے افرادی قوت دے شعبیاں اچ جاری اصلاحات تے تفصیلی بریفنگ ݙتی ڳئی۔ اجلاس اچ وفاقی وزراء احسن اقبال، اعظم نذیر تارڑ، احد خان چیمہ، محمد اورنگزیب، عطاء اللہ تارڑ، وزیرِ مملکت بلال اظہر کیانی، اٹارنی جنرل منصور اعوان تے اعلیٰ سرکاری افسران شریک ہن۔