کشمیریاں کوں کڈاھیں کلہا چھڑیسوں نہ ہی مسلہ فلسطین دے ڈو ریاستی حل تئیں اسرائیل نال کوئی گالھ تھیسی،سعودی عرب نال تعلقات پہلے آلی کار تکڑے راہسن،کرپشن تے سمجھوتہ تھیسی نہ ترقی دا عمل رکسی،اوکھ دے باوجود ملک استحکام ڈکھاونڑ لگ گئے، صدر مملکت دا پارلیمنٹ دے مشترکہ اجلاس نال خطاب

اسلام آباد ۔ 20 اگست (اے پی پی) صدر مملکت ڈاکٹر عارف علوی اسرائیل کوں نہ منر دے وزیراعظم عمران خان دے ڈو ٹوک موقف دی حمایت کریندے آکھیے جو پاکستان مسلہ فلسطین دا ڈو ریاستی حل چاہندے جیندے ٹیکھ تھیونڑ تئیں اسرائیل کوں منر دی کوئی وی گالھ نئیں تھی سگدی،کشمیریاں کوں کڈاھیں کلہا چھڑیسوں نہ ہی مسلہ فلسطین دے ڈو ریاستی حل تئیں اسرائیل نال کوئی گالھ تھیسی،سعودی عرب نال تعلقات پہلے آلی کار تکڑے راہسن،سول و عسکری قیادت‘سارے ادارے اتے میڈیاہک مٹھ ہین،اساں قانونی، معاشی اتے معاشرتی انصاف چاہندوں،کرپشن تے سمجھوتہ تھیسی نہ ترقی دا عمل رکسی،اوکھ دے باوجود ملک استحکام ڈکھاونڑ لگ گئے،پورا جگ وی منیدے جو پاکستان درست سمت دو ویندا پئے۔اے گالھ انہاں تریجھے پارلیمانی سال دی شروعات تے پارلیمنٹ دے مشترکہ اجلاس نال خطاب اچ آکھی۔ انہاںا ٓکھیا جو پاکستان کشمیریاں کوں کڈاھیں وی کلہا نہ چھڑیسی،بھارت ہر معاہدے اتے عالمی قوانین دی خلاف ورزی کیتی اے،بھارت دی موجودہ ہندوتوا فاشسٹ پالیسی قائم نہ رہسی،بھل کشمیر تیکھےا ٓزاد تھیسی،ساڈے سعودی عرب نال تعلقات جیویں پہلے تکڑے ہین اویں ہی اگو تے وی راہسن ایندے اچ کوئی دراڑ نئیں پو سگدی،سول و عسکری قیادت‘سارے ادارے اتے میڈیا ہکے صفحے تے ہین، اساں سارے قانونی، معاشی اتے معاشرتی انصاف چاہندے ہیں، کڈاھیں وی کرپشن تے کوئی سمجھوتہ نہ کیتا ویسی،ترقی دے عمل اچ وی کوئی رکاوٹ نہ آونڑ ڈتی ویسی۔ صدر مملکت آکھیے جو اوکھے حالات دے باوجود معیشت کامیابی دو ٹردی پئی اے،عالمی اداریاں موڈیز اتے فچ پاکستان دی معاشی درجہ بندی کوں اچا قرار ڈتے،دیامر بھاشا ڈیم دی تکمیل نال ملکی توانائی دی لورھ پوری تھیسی،تعلیم،صحت،انفراسٹرکچر،یکساں قومی نصاب حکومت دے وڈے کارنامے ہین،اسلام دے اسولاں دے مطابق تریمتیں دے حق ِوراثت دی پاسداری یقینی بنڑائی ویسی۔انہاں آکھیے جو وفاقی اتے صوبائی حکومت دے تعاون نال کراچی دے مسائل تے قابو پاتا ونج سگسی، قوم دہشت گردی، انتہا پسندی اتے بئے چیلنجاں نال کامیابی نال قابو پاتے،کرونا دے خلاف سمارٹ لاک ڈاون پالیسی دی کامیابی سودھا کورونا صورتحال اچ کمزور طبقات کیتے حکومتی ریلیف پیکیج قابل ستائش اقدام ہین، غریب پروری دی پالیسی جاری رکھی ویسی۔