بھارت ریاستی دہشت گردی اچ براہ راست ملوث اتے ہوا ݙیندا پئے، بھارت اچ انتہا پسندی عروج تے اے جیڑھی جو دنیا تے نشابر تھی ڳئی اے، دنیا دی ساریاں توں وݙی جمہوریت دا دعویٰ کرݨ آلی بھارتی ریاست روگ سٹیٹ دا روپ اختیار کرݨ ویندی پئی اے، وزیرخارجہ، ڈی جی آئی ایس پی آر

اسلام آباد۔14نومبر  (اے پی پی) وزیرخارجہ شاہ محمود قریشی آکھیا جو بھارت دے دہشت گردی دی کاروائیاں دی سرپرستی دے ناقابل تردید ثبوب موجود ہن،بھارت ریاستی دہشت گردی اچ براہ راست ملوث اتے اونکوں ہوا ݙیندا پئے۔بھارت اچ انتہا پسندی عروج تے اے جیڑھی جو دنیا تے نشابر تھی ڳئی اے۔ دنیا دی ساریاں توں وݙی جمہوریت دا دعویٰ کرݨ آلے بھارتی ریاست روگ سٹیٹ دا روپ اختیار کریندی پئی اے۔ بھارت پاکستان کوں غیر مستحکم کرݨ دا منصوبہ بݨا ڳھدے جئیں بارے عالمی برادری کوں ویلھے ویلھے نال ݙسیا ویندا رہ ڳے۔ بھارت دی ریاستی دہشت گردی بارے ٻیا چپ رہوݨ پاکستان اتے جنوبی ایشیا دے فائدے اچ کائنی۔جنوبی ایشیا اچ امن و امان سانڳے پاکستان دے کردار کوں بھارت ہضم نی کر سڳدا پیا۔ وزیر خارجہ شاہ محمود قریشی  چھݨ چھݨ کوں اتھاں  پاک فوج دے شعبہ تعلقات عامہ (آئی ایس پی آر) دے ڈائریکٹر جنرل  میجر جنرل بابر افتخار دے رلے پریس کانفرنس نال خطاب کیتا۔ایں موقع تے پاکستان اچ دہشت گردی دی کاروائیاں اچ بھارتی اداریاں دے ملوث تھیوݨ،کالعدم تنظیماں دی مالی معاونت،کالعدم تنظیماں دے کارکناں کوں تربیت ݙیوݨ اتے اسلحہ تے گولہ بارود ݙیوݨ دے علاوہ ملک دے مختلف حصیاں اچ ٹارگٹس دی نشاندہی اتے رقم بھیجݨ دے ثبوت پیش کیتے ڳن۔ پریس کانفرنس اچ دہشت گرداں اتے بھارتی خفیہ ایجنسیاں دے افسراں دی ڳالھ مہاڑ دی ریکارڈنگ اتے ویڈٰیوز وی میڈیا نال شیئر کیتی ڳئی۔وزیرخارجہ عالمی برادری تے زور ݙتا جو بھارت دی ریاستی دہشت گردی،عالمی قوانین دی خلاف ورزی دے خلاف اقدامات کیتے ونڄن۔ ایں موقع تے ڳالھ مہاڑ کریندیں ہوئیں پاک فوج دے شعبہ تعلقات عامہ (آئی ایس پی آر) دے ڈائریکٹر جنرل میجر جنرل بابر افتخارآکھیا جو اساں ݙے بہوں ثبوت ہن جنہاں اچوں کڄھ تساݙے سامھے پیش کریندا پیاں۔ انہاں آکھیا جو بھارت پاکستان اچ دہشت گرد تنظیماں دے خاتمے دے بعد انہاں دا معاوم بݨ ڳے۔ پاکستان دے عدم استحکام سانگے بھارت دہشت گرداں کوں پیسہ،اسلحہ اتے تربیت نال دہشت گردی کوں سپانسر کیتے۔ وزیرخارجہ آکھیا جو پاکستان اچ تھیوݨ آلے اجوکے واقعے اوندے گواہ ہن۔انہاں آکھیا جو بھارت ٹی ٹی پی ، جماعت الاحرار ، حزب الاحرار ، بی آر اے ، بی ایل اے اتے بی ایل ایفداد اکنسورشیم بݨائے۔انہاں آکھیا جو 2018ء اچ ایں بارے بھارتی افسر کرنل راجیش افغانستان اچ بھارتی سفارتخانے اچ دہشت گرداں نال چار ملاقاتاں کیتی اتے پاکستان اچ وݙے شہراں اچ دہشت گرد کاروائیاں دا منصوبہ بݨایا۔ انہاں آکھیا جو بھارتی ایجنسیاں آئی ایس آئی نال پاکستان دے تعلقات بارے پراپیگنڈہ کریندن۔انہاں آکھیا جو بھارتی تنظیماں داعش کمانڈر عبدالرحیم المعروف عبدالر رحمان مسلم دوست دے حوالے آپݨے بندے کیتے، میجر جنرل بابر افتخار آکھیا جو دہشت گردی دی فنڈنگ سانگے بھارتی سفارتخانے سپانسرشپ دے مراکز ہن۔افغانستان اچ بھارتی سفارتکار اوندی نگرانی کریندے پئن۔بھارتی سفیر اتے قونصلر ٹی ٹی پی اتے بلوچ علیحدگی پسنداں نال تعاون اتے انہاں نال ملاقاتاں کیتی۔ بھارت آپݨے بندیاں کوں تریجھے ملک اچ رقم ݙیندا پئے۔انہاں آکھیا جو ݙوہیں واقعیاں اچ بھارت دے پنجاب بینک توں 28 ہزار ݙالر جݙانجو ہک ٻئے بھارتی بینک توں افغانستان اچ 55 ہزار ڈالر دی ٹرانزیکشن تھی اے۔ انہاں آکھیا جو بھارتی سفارتکار ٹی ٹی پی رہنماواں کوں اٹھ لکھ ڈالر توں ودھ رقم ݙے چکیے۔ بلوچستان اچ کاروائی سانڳے بھارت ست سو بندیاں دی ملیشیا بݨائی جئیں سانگے 16ملین ڈالر رکھے۔بھارتی سفارتخانہ قوم پرستاں کوں انسانی امداد دے تحت رقم ݙیندے اتے 22.35ملین ݙالر دی ٹرانزیکشن کیتی ڳی۔بلوچستان اچ امن وامان خراب کرݨ سانگے پنج ملین ڈالر ڈتے ڳئے۔ انہاں آکھیا جو سرفراز مرچنٹ اتے طارق میر منیے جو ݙو بھارتی کمپنیاں الطاف حسین کوں ترائے ملین ڈالر توں ودھ ݙتے۔ ڈی جی آئی ایس پی آر آکھیا جو گزریل ݙینھ بھارت ایل او سی تے حملہ کیتا اتے بھارت ولا ولا معصوم شہریاں کوں آپݨا نشانہ بݨیندا پئے۔بھارت آپݨی ناکامیاں لکاوݨ سانگے ایل او سی تے فائرنگ کریندے۔انہاں آکھیا جو کل بھارت دی فائرنگ دے جواب اچ بھارت دا جانی تے مالی زیان تھیے۔ ایں موقع تے ۔وزیرخارجہ عالمی برادری تے زور ݙتا جو بھارت دی ریاستی دہشت گردی،عالمی قوانین دی خلاف ورزی دے خلاف اقدامات کیتے ونڄن۔