وزیراعظم شہباز شریف نال پاک جاپان گروپ دے سی ای او چوہدری آصف محمود دی ملاقات

اسلام آباد۔ 16 ستمبر (اے پی پی) وزیراعظم محمد شہباز شریف نال پاک جاپان گروپ دے سی ای او چوہدری آصف محمود ملاقات کیتی، وزیراعظم پاکستانی مصنوعات دے عالمی منڈیاں اچ ودھارے، نویاں بین الاقوامی منڈیاں تئیں رسائی ودھاوݨ، برآمد کنندگان کوں درپیش مشکلات دور کرݨ تے ملکی برآمدات دے حجم اچ اضافے کیتے موثر اقدامات دی اہمیت تے زور ݙتا۔ وزیراعظم دفتر دے میڈیا ونگ توں جاری بیان موجب ملاقات اچ کاروباری برادری کوں سہولتاں، ملکی برآمدات ودھاوݨ دے حوالے نال اقدامات تے ٻاہرلے ملک رہݨ آلے پاکستانیاں دی فلاح و بہبود کیتے اقدامات دے حوالے نال ڳالھ کیتی ۔ ملاقات دے دوران ٻاہرلے ملک رہݨ آلے پاکستانیاں کوں سرمایہ کاری کیتے سازگار ماحول ݙیوݨ تے انہاں دے مسئلیں دے حل کیتے موثر اقدامات تے وی ڳالھ تھئی۔ وزیراعظم آکھیا جو حکومت کاروباری برادری کوں سہولتاں ݙیوݨ ، سرمایہ کاری دے ودھارے تے برآمدات اچ ودھارے کیتے ہر ممکن اقدامات کریندی پئی اے۔ ملاقات اچ پاکستان تے جاپان وچال تجارتی و اقتصادی تعاون کوں مزید وسعت ݙیوݨ دے امور تے وی ڳالھ کیتی ۔ وزیراعظم پاکستانی مصنوعات کوں عالمی منڈیاں اچ ودھارا ݙیوݨ، نویاں بین الاقوامی منڈیاں تئیں رسائی ودھاوݨ، برآمد کنندگان کوں درپیش اوکھ دور کرݨ تے ملکی برآمدات دے حجم اچ ودھارے کیتے موثر اقدامات دی اہمیت تے زور ݙتا۔ ایں موقع تے وزیراعظم دے مشیر ہارون اختر وی موجود ہن۔