بین الافغان مذاکرات اچ طے تھیوݨ آلے فیصلیاں دا خیر مقدم کریسوں، پاکستان اتے افغانستان وچال ݙو پاسہ تجارت دے ودھارے سانڳے عملی کم کریندے پیوں، وزیر خارجہ مخدوم شاہ محمود قریشی

اسلام آباد۔12جنوری(اے پی پی) وزیر خارجہ مخدوم شاہ محمود قریشی آکھیا جو بین الافغان مذاکرات اچ طے تھیوݨ آلے فیصلیاں دا خیر مقدم کریسوں، پاکستان اتے افغانستان وچال ݙو پاسہ تجارت دے ودھارے سانڳے عملی کم کریندے پیوں۔ خطے اچ امن تے استحکام افغانستان اچ امن نال جڑیا ہوئے۔ اے ڳالھیں انہاں افغان حزب وحدت اسلامی دے رہنماء محمد کریم خلیلی نال ڳالھ مہاڑ کریندیں ہوئیں آکھی جنہاں وفد دے رلے منگل کوں وزارت خارجہ اچ انہاں نال ملاقات کیتی۔ دفتر خارجہ دے ترجمان دے مطابق ملاقات اچ افغان امن عمل سودھے آپسی دلچسپی دے معاملیاں تے ڳالھ مہاڑ کیتی ڳئی۔ سیکرٹری خارجہ سہیل محمود، نمائندہ خصوصی برائے افغانستان ایمبیسڈر محمد صادق اتے وزارت خارجہ دے سینئر افسر وی ایں موقع تے موجود ہن۔ شاہ محمود قریشی ، کریم۔خلیلی اتے وفد کوں وزارت خارجہ آوݨ تے خوش آمدید آکھدیں ہوئیں آکھیا جو پاکستان اتے افغانستان وچال تاریخی تعلقات اتے ہکو سواں ثقافتی تے تہذیبی اقدار تے برادرانہ تعلقات ہن۔