وزیراعظم دی فیول سبسڈی ریلیف کیتے رجسٹریشن بارے ایس ایم ایس مفت کرݨ دی ہدایت

اسلام آباد۔ 14 ستمبر(اے پی پی)وزیراعظم محمد شہباز شریف فیول سبسڈی ریلیف کیتے رجسٹریشن بارے ایس ایم ایس کوں مفت کرݨ دی ہدایت کریندے آکھیے جو عوام کوں رجسٹریشن اتے ٻئے ضروری مراحل اچ ہر ممکن رہنمائی ݙتی ونڄے۔ وزیراعظم محمد شہباز شریف دی زیرِ صدارت خلیج دی صورتحال پاروں پٹرولیم مصنوعات دیاں قیمتاں ودھݨ نال گھٹ آمدنی اتے متوسط طبقے کوں ریلیف ݙیوݨ کیتے پی ایم سپیشل ریلیف سکیم دی پیش رفت تے اعلیٰ سطح اجلاس تھئے۔ سکیم دے تحت موٹر سائیکل، رکشہ اتے 800 سی سی تائیں دی گاݙیاں دے مالکان کوں فیول سبسڈی ݙتی ویسی۔ وزیراعظم سبسڈی ریلیف کیتے رجسٹریشن بارے ضروری ایس ایم ایس سروس کوں مفت کرݨ دی ہدایت کیتی۔ اسلام آباد دے رہائشیاں کیتے فیول سبسڈی سکیم 14 اتے 15 ستمبر دی وچلی رات شروع کر ݙتی ویسی ڄݙاں جو ملک ٻھر اچ بشمول آزاد جموں و کشمیر اتے گلگت بلتستان اچ 16 اتے 17 ستمبر دی وچلی رات توں پٹرول تے ریلیف ڳھدا ونڄ سڳسی۔ وزیراعظم چیف کمشنر اتے آئی جی اسلام آباد سودھا انتظامیہ کوں عوام دی رہنمائی کیتے فیلڈ اچ موجود رہݨ دی ہدایت کیتی۔ وزیراعظم ملک بھر اچ عوامی نمائندیاں تے رضاکاراں کوں عوام دی رہنمائی کیتے متحرک کرݨ اتے فیول سبسڈی سکیم دے حوالے نال بھرپور میڈیا آگاہی مہم چلاوݨ دی ہدایت کیتی۔ انہاں آکھیا جو پرنٹ، الیکٹرانک، ڈیجیٹل تے سوشل میڈیا سودھا سارے پلیٹ فارمز تے آگاہی مہم کوں تیز رفتاری نال چلایا ونڄے، فیول سبسڈی سکیم دے ثمرات ودھ توں ودھ مستحق شہریاں تئیں پچاوݨ کیتے سارے ذرائع لائے ونڄن۔ وزیراعظم آکھیا جو سکیم دی کامیابی کیتے عوام کوں ویلھے سر معلومات تے رہنمائی ݙیوو۔ سکیم دیاں تفصیلات اردو ویب سائٹ www.pmfuelrelief.pk⁠ تے دستیاب ہن۔ اجلاس اچ نائب وزیراعظم و وزیرِ خارجہ محمد اسحاق ڈار، وفاقی وزراء ڈاکٹر مصدق مسعود ملک، احد خان چیمہ، محمد اورنگزیب، عطا اللہ تارڑ، علی پرویز ملک، شزہ فاطمہ خواجہ، وزیرِ مملکت برائے خزانہ بلال اظہر کیانی، معاونِ خصوصی طارق باجوہ اتے متعلقہ اداریاں دے اعلیٰ افسران شریک ہن۔