شنگھائی تعاون تنظیم دے علاقائی انسدادِ دہشتگردی ڈھانچے دی کونسل دا 46واں اجلاس، خطے اچ کشیدگی ڳھٹاوݨ، امن اتے استحکام دیاں کوششاں دی حمایت

اسلام آباد۔ 14 ستمبر (اے پی پی)شنگھائی تعاون تنظیم (ایس سی او) دے علاقائی انسدادِ دہشتگردی ڈھانچے دی کونسل ایران دی خودمختاری، سلامتی اتے علاقائی سالمیت دے تحفظ دے اپݨے مؤقف کوں دوہریندے خطے اچ کشیدگی ڳھٹاوݨ، امن اتے استحکام دیاں کوششاں دی حمایت کیتی اے۔ شنگھائی تعاون تنظیم (ایس سی او) دے علاقائی انسدادِ دہشت گردی ڈھانچے دی کونسل دا 46واں اجلاس اسلام آباد اچ تھئے جیندی صدارت پاکستان کیتی۔ اجلاس اچ پاکستان سودھا بیلاروس، بھارت، ایران، قازقستان، چین، کرغزستان، روسی فیڈریشن، تاجکستان اتے ازبکستان دے متعلقہ حکام دے وفود، ایس سی او ریجنل اینٹی ٹیررسٹ سٹرکچر دی ایگزیکٹو کمیٹی دے نمائندیاں شرکت کیتی۔ اجلاس اچ علاقائی سلامتی دے شعبے اچ بین الاقوامی ایجنڈے بارے موجودہ امور تے ڳالھ مہاڑ کیتی ڳئی۔ ایس سی او ریجنل اینٹی ٹیررسٹ سٹرکچر دی کونسل ایران دے خلاف تھیوݨ والے تازہ فوجی حملیاں دی مذمت کیتی اتے ایں معاملے تے ایس سی او دے موقف کوں دوہرائے اتے حملیاں اچ ایران دے سپریم لیڈر سید علی خامنہ ای دی المناک شہادت تے ایرانی حکومت تے عوام ڄݙاں جو شہید تھیوݨ آلے لوکاں دے ٹٻراں کوں مکاݨ ݙیندے کونسل ایران دی خودمختاری، سلامتی تے علاقائی سالمیت دے تحفظ دے اپݨے مؤقف دی توثیق کیتی۔ کونسل کشیدگی اچ کمی، امن دے قیام تے خطے اچ استحکام کوں یقینی بݨاوݨ دیاں کوششاں دی حمایت وی کیتی۔ کونسل ایس سی او دے رکن ملکاں دے متعلقہ حکام وچال دہشت گردی، علیحدگی پسندی تے انتہا پسندی دے خلاف تعاون اچ رابطہ کاری بارے ایس سی او ریجنل اینٹی ٹیررسٹ سٹرکچر دی کونسل دے پہلے توں منظور شدہ فیصلیاں تے عملدرآمد دا جائزہ گھدا۔ ایں توں علاوہ “برائی دیاں طاقتاں” دے انسداد بارے ݙاݙھے اہم امور تے ایگزیکٹو کمیٹی اتے ماہرین دے گروپاں دے ورک پلانز دی منظوری ݙتی ڳئی۔ فریقین دے تعاون کوں مضبوط بݨاوݨ کیتے معلوماتی ڈھانچے دے قیام اتے اوکوں بہتر بݨاوݨ دے فیصلے وی کیتے ڳئے۔ اے اتفاق کیتا ڳیا جو 2027 اچ دہشت گردی دے انسداد دے شعبے اچ ہک مشترکہ معلوماتی آپریشن، دہشت گردی، علیحدگی پسندی تے انتہا پسندی دے مقاصد کیتے انٹرنیٹ دے استعمال روکم بارے ہک عملی سیمینار اتے ایس سی او دے رکن ملکاں دے متعلقہ حکام دی مشترکہ انسدادِ دہشت گردی مشق کیتی ویسی۔ دہشت گردی، علیحدگی پسندی تے انتہا پسندی دے خلاف تعاون دے شعبے اچ ایس سی او دے رکن ملکاں تے ایس سی او دے ہک مبصر ملک وچال تعاون سانڳے تیرہویں بین الاقوامی سائنسی و عملی کانفرنس جمہوریہ قازقستان اچ تھیسی۔ ایس سی او دے علاقائی انسدادِ دہشت گردی ڈھانچے دی ایگزیکٹو کمیٹی دیاں سرگرمیاں کیتے انتظامی اتے افرادی قوت دے معاملیاں تے غور وی کیتا ڳیا۔ کمیٹی دیاں سرگرمیاں دی ترقی اتے ایس سی او دے رکن ملکاں دے متعلقہ اداریاں اتے ایس سی او دے علاقائی انسدادِ دہشتگردی ڈھانچے دی ایگزیکٹو کمیٹی دے عہدیداران کوں تعاون ودھاوݨ سانڳے کردار تے اعزازات وی ݙتے ڳئے۔