اسلام آباد۔25جنوری(اے پی پی)وزیر خارجہ مخدوم شاہ محمود قریشی آکھیے جو پی ڈی ایم ہک غیر فطری اتے عارضی اتحاد اے،اساں تے ساݙے سنڳتی تحریک عدم اعتماد دا سیاسی، جمہوری اتے پارلیمانی انداز اچ مقابلہ کریسن اتے انہاں کوں ہریسوں۔ اپݨے ہک بیان اچ شاہ محمود قریشی آکھیا جو پی ڈی ایم دی صفاں اچ اختلاف کھل تے سامݨے آڳئن،استعفیاں دے معاملے تے مسلم لیگ( ن ) اچ مریم نواز اتے شہباز شریف دی سوچ دا اختلاف سامݨے اے، مولانا فضل الرحمن لانگ مارچ کرݨ تے کھڑن تانڄو بلاول بھٹو زرداری اسمبلیاں دا رخ کرݨ دی ڳالھ کریندے پئن ،او سمجھدن جو انہاں دی احتجاجی سیاست تے عوام توجہ نئیں ݙتی۔ شاہ محمود قریشی آکھیے جو وزیر اعظم عمران خان اتے پاکستان تحریک انصاف شفاف انتخابات چاہندی اے ،تہوں اساں سینیٹ انتخابات اچ اوپن ووٹنگ دی تجویز ݙتی اے جیندےکیتے اساں قانون سازی کوں وی تیار ہیں۔سوال اے ہے جو کیا اپوزیشن ایں سانڳے قانون سازی کیتے ساݙا ہتھ ونݙاوݨ ݙیوݨ کوں تیار اے؟مخدوم شاہ محمود قریشی آکھیے جو مقبوضہ کشمیر ہک منیا ہویا بین الاقوامی تنازع اے، جیکر بھارت دا مؤقف تکڑا اے تاں او ڳالھ مہاڑ توں کیوں بھڄدے،اساں دنیا کوں ولا ولا ݙسیندے پیئوں جو کشمیر ہک فلیش پوائنٹ بݨ چکے جیندا تیکھے اتے مستقل حل کݙھݨ دی لوڑھ اے ۔
