اسلام آباد۔28جولائی (اے پی پی):وزیر مملکت اطلاعات و نشریات فرخ حبیب آکھیے جو چار سال توں ودھ عرصہ لنڳھ ڳئے پیپلز پارٹی تے مسلم لیگ ن آپݨی فارن فنڈنگ دا ریکارڈ الیکشن کمیشن اچ جمع نی کرایا ، سٹیٹ بینک دے ݙتے ڳئے ریکارڈ دے مطابق ݙوہیں پارٹیاں دے 19اکائونٹس ایجھے ہن جیڑھے جو گواشواریں اچ ظاہر نی کیتے ڳئے ، اے اکائونٹس منی لانڈرنگ ، کالا دھن چٹا کرݨ کیتے استعمال کیتے ڳئن ،انہاں اکائونٹس اچ ارباں دی ٹرانزیکشنز تھئن ،بھارتی خفیہ ایجنسی را دے حمد اللہ محب جیہے ݙیہاڑی داراں نال ملاقاتاں ، مودی دے ایجنڈے کوں اڳوں ودھاوݨ ، حریت راہنماواں توں پرے تھیوݨ سودھے ملک دشمن بیانیے تے آزاد کشمیر اچ مسلم لیگ ن کوں عبرت ناک شکست تھئی اے ،ہݨ ن لیگ دھرنے ݙیوے یا احتجاج کرے کشمیریاں اپݨا فیصلہ سݨا ݙتے۔ او ٻدھ کوں الیکشن کمیشن دے باہروں میڈیا نال ڳال مہاڑ کریندے پئے ہن ۔۔ وزیر مملکت اطلاعات و نشریات فرخ حبیب آکھیے جو اساں الیکشن کمیشن اچ درخواست دائر کیتی ہئی جو مسلم لیگ ن اتے پیپلز پارٹی دے فارن اکائونٹس تئیں فنانشنل ایکسپرٹ اتے چارٹر اکائونٹس کوں جانچ پڑتال کیتے رسائی ݙتی ونڄے ، پی ٹی آئی دے اکائونٹس تئیں ماضی اچ چارٹرڈ اکائونٹس کوں رسائی ݙتی ڳئی ہئی اساں وی اے سہولت منگدے پیوں ۔ انہاں آکھیے جو سٹیٹ بینک جیڑھا ریکارڈ جمع کرائے ایندے مطابق مسلم لیگ ن دے 12اتے پیپلز پارٹی دے 7ایجھے فارن اکائونٹس ہن جیڑھے جو گواشوریں اچ ظاہر نی کیتے ڳئے ۔
