اسلام آباد۔28جولائی (اے پی پی):وفاقی وزیر اطلاعات و نشریات چوہدری فواد حسین آکھیے جو مستحکم افغانستان دے ذریعے پورے خطے کوں وسطی ایشیا اتے یورپ نال رلاوݨ وزیراعظم عمران خان دا وژن اے، اساں معاشی بہتری کیتے خطے اچ امن اتے استحکام چاہندوں ، پاکستان اتے افغانستان کوں آپݨے مفاد دا فیصلہ خود کرݨا ہوسی، سپر پاورز اپݨی گیم کھیݙ تے چلی ویندی اے ، نتیجہ اساکوں بھوڳݨا پوندے ، پاکستان تے افغانستان دے لوک ھک ݙوجھے نال تاریخی رشتے اچ ڳھنڈیے پئن ، اساݙے تعلقات اتے تلے تھیوݨ دے باوجود مستحکم ہن ۔ اے ڳال انہاں ٻدھ کوں اتھاں پاک افغان یوتھ فورم دے اہتمام نال پاک افغان میڈیا کانکلیو دے افتتاحی سیشن توں خطاب کریندے ہوئیں آکھی اے ۔چوہدری فواد حسین آکھیے جو افغانستان تے پاکستان دے لوک مذہبی، ثقافتی تے جغرافیائی طور تے ھک ݙوجھے نال تاریخی رشتیں اچ ڳھنڈیے پئن ۔ افغانستان دے لوک اساݙے آپݨے تے ھکے قبائل دے لوک ہن ، انہاں دے نال اساݙی قربت اے ، اساݙی زبان اتے ثقافت ھک سویں اے افغانستان نال اساݙے تعلقات اچ تنائو وی رہیا تے محبت وی ۔ وفاقی وزیر اطلاعات آکھیے جو تاریخ چا تے ݙیکھو تاں پاکستان اتے افغانستان دے درمیان تنائو دی کیفیت تاریخ دا جبر ہئی ۔ انہاں آکھیے جو روس اتے امریکا کابل تے قبضہ کیتا تے نتائج اساکوں بھوڳݨے پئے ۔ القاعدہ نیویارک اچ کارروائی کیتی جیں دے نتیجے اچ افغانستان دے اندر صورتحال خراب تھئی ، افغانستان اچ امریکا دی پالیسی ناکام تھئی تاں ایندے نتیجے افغانستان تے پاکستان ݙوہیں بھوڳیندے پئن ۔
