اسلام آباد۔20اکتوبر (اے پی پی):وزیر مملکت اطلاعات و نشریات فرخ حبیب آکھیے جو فارن فنڈنگ دے حوالے نال مریم صفدر اتے بلاول زرداری کوں تلاشی ݙیوݨی پوسی، اے جتی لہا تے بھڄݨ دی تیاری وچ ہن لیکن ایں واری انہاں کوں بھڄݨ نہ ݙیسوں ،اصل کہانی اکائونٹس دی جانچ پڑتال دے بعد سامݨے آوݨی اے کیویں پارٹی اکائونٹس کوں منی لانڈرنگ کیتے استعمال کیتا ڳئے، پارٹی اکائونٹس اچ وی پاپڑ آلے، فالودے آلے کردارسامݨے آسن ، پی ٹی آئی سکروٹنی کمیٹی دے سامݨے اپݨا مکمل ریکارڈ پیش کیتے، ای سی پی کوں 40 ہزار عطیات ݙیوݨ آلیں دا ریکارڈ اتے 16 والیم پیش کیتن ، الیکشن کمیشن توں مطالبہ اے جو جے یوآئی سودھے ساریاں پارٹیاں توں اکائونٹس دا حساب گھنے ، فضل الرحمان اڄ تئیں پارٹی اکائونٹس دا حساب نی ݙتا ۔ او ٻدھ کوں الیکشن کمیشن دے باہروں میڈیا نال ڳال مہاڑ کریندے پئے ہن ،وزیر مملکت فرخ حبیب آکھیے جو مریم صفدر اتے بلاول زرداری نہ قانون کوں منیندن تے نہ ہی آئین کوں، ادارے انہاں دے خلاف قانونی کارروائی کرن تاں اے حملہ آور تھیندن، تاریخ گواہ اے جو اے لوک سپریم کورٹ، نیب تے حملہ آور تھئے، ججز دے خلاف تنقید انہاں دا وطیرہ اے۔ انہاں آکھیے جو الیکشن کمیشن دی سکروٹنی کمیٹی ھک سب کمیٹی قائم کیتی اے جیں دا 25 اکتوبر کوں اجلاس تھیسی ، اساݙے فنانشل ایکسپرٹ اتے چارٹر اکائونٹ 8 ݙینھ پیپلز پارٹی اتے ول 8 ݙینھ ،ن لیگ دے اکائونٹس دی جانچ پڑتال کریسن ،یومیہ دی بنیاد تے جانچ پڑتال دی اپ ڈیٹ قوم دے سامݨے رکھیندن۔
