اسلام آباد۔20اکتوبر(اے پی پی)وزیراعظم عمران خان دی اڳواݨی اچ پی ٹی آئی دی کور کمیٹی دا اجلاس تھئے جیندے اچ مہانڳ ڳھٹاوݨ کیتے ضلعی سطح تے کمیٹیاں ٻݨاوݨ اتے گھٹ آمدن آلے لوکاں کوں پٹرول تے رعایت ݙیوݨ دے اقدامات تے غور کیتا ڳئے۔ اجلاس اچ وفاقی وزیر اطلاعات و نشریات چوہدری فواد حسین، وزیر خزانہ پنجاب مخدوم ہاشم جواں بخت، وزیر خزانہ خیبر پختونخوا تیمور سلیم جھگڑا، صدر نیشنل بینک عارف عثمانی، چیف سیکرٹری پنجاب، خیبر پختونخوا اتے سینئر افسران شرکت کیتی۔ وزیر خزانہ شوکت ترین ویڈیو لنک تے موجود ہن۔ اجلاس اچ ملکی سیاسی صورتحال، پارلیمانی امور سودھا اپوزیشن دی تحریک نال نبڑݨ دی حکمت عملی تے صلاح مشورہ کیتا ڳئے۔ معاون خصوصی برائے تخفیف غربت ڈاکٹر ثانیہ نشتر اجلاس کوں احساس ٹارگٹڈ سبسڈی پروگرام تے بریفنگ ݙتی۔ وزیراعظم ڳھٹ آمدنی آلے لوکاں کوں موٹرسائیکل، رکشہ اتے عوامی سواری کیتے پٹرول تے ٹارگٹیݙ سبسڈی ݙیوݨ کیتے اقدامات دی ہدایت کیتی اتے آکھیے جو مہانڳ ڳھٹ کرݨ کیتے ضلعی سطح تے کمیٹیاں ٻݨایاں ونڄن، ٹارگٹڈ سبسڈی پروگرام وفاق اتے صوبائی حکومتاں دی مالی معاونت نال شروع کیتا ویسی۔ وزیراعظم آکھیا جو مہانڳ دا احساس اے، غریب طبقے کیتے ٹارگٹڈ سبسڈی دا وݙا پروگرام تیکھے شروع کیتا ویسی، حکومت صحت کارڈ، کسان کارڈ اتے احساس پروگرام دا دائرہ کار ٻیا ودھیسی۔
