اسلام آباد۔21اکتوبر (اے پی پی):وزیراعظم عمران خان آھیے جو نینگر نسل کوں اسلامی تاریخ بارے آگاہی ݙیوݨ کیتے جدید ذرائع ابلاغ کوں بروئے کار گھن آوݨا ہوسی اتے روایتی موضوعات توں ہٹ تے تاریخی کہانیاں تے مبنی ڈرامے اتے فلماں بݨاوݨیاں ہوسن ، اے ڳال انہاں فلمساز شہزاد نواز، ترک پروڈیوسر ایمرے کونُک، سید جنید علی شاہ اتے ڈاکٹر کاشف نال ڳال مہاڑ کریندے ہوئیں آکھی اے ، جنہاں خمیس کوں اتھاں انہاں نال ملاقات کیتی ۔ ملاقات اچ سینیٹ دی قائمہ کمیٹی اطلاعات و نشریات دے چیئرمین سینیٹر فیصل جاوید وی موجود ہن ۔وزیراعظم آکھیے جو صلاح الدین ایوبی تاریخ دا ایجھا کردار اے جیں دی مغرب وی مثالاں ݙیندے، انہاں بیت المقدس دی تاریخی فتح دے بعد عام معافی دا اعلان کیتا۔ وزیرِ اعظم آکھیے جو صلاح الدین ایوبی دی زندگی تے سیریز نینگراں کوں ایں تاریخی کردار بارے آگاہی ݙیسی ، ملاقات اچ وزیرِ اعظم کوں پاکستان اتے ترکی دے درمیان مشترکہ منصوبے صلاح الدین سیریز تے تفصیل بارے ݙسایا ڳیا ۔ سیریز تے منصوبہ بندی مکمل اے جݙاں جو ایندی شوٹنگ دا آغاز آئندے سال اپریل اچ کرݙتا ویسی ۔
