اسلام آباد۔21اکتوبر(اے پی پی)وزیراعظم عمران خان آکھیے جو خیبرپختونخواہ اچ خوردنی تیل، زیتون دی کاشت اتے سیاحت دی ترقی کیتے ودھ اقدامات کیتے ونڄن، ایندے نال کساناں دی ترقی سودھا ملکی معیشت تکڑی کرݨ اچ مدد ملسی۔ اے ڳالھ انہاں کے پی کے اچ سیاحت دی ترقی سانڳے جاری ترقیاتی منصوبیاں دے جائزہ اجلاس دی اڳواݨی کریندے آکھی۔ اجلاس اچ سپیکر قومی اسمبلی اسد قیصر، وزیرِ دفاع پرویز خٹک، وفاقی وزیر برائے امور کشمیر و گلگت بلتستان علی امین گنڈا پور، گورنر خیبر پختونخوا شاہ فرمان، وزیرِ اعلیٰ خیبرپختونخوا محمود خان اتے صوبائی وزیر انفارمیشن ٹیکنالوجی عاطف خان موجود ہن۔ وزیراعظم آکھیے جو حکومت دوردراز سیاحتی مقامات تئیں رسائی اتے معاشی سرگرمیاں تیز کرݨ کیتے انفراسٹرکچر منصوبیاں تے تیزی نال کم کریندی پئی اے، سارے جاری ترقیاتی منصوبے شفافیت نال تیکھے مکمل کیتے ونڄن، اجلاس اچ جاری ترقیاتی منصوبیاں، سیاسی صورتحال، آندے بلدیاتی انتخابات اتے پارٹی امور تے الایا ڳئے۔
