کراچی۔20فروری (اے پی پی):صدر مملکت ڈاکٹرعارف علوی طلباء کوں الویندے ہوئیں آکھیے جو تساکوں محنت کرݨی چاہیدی اے تے ملک اچ آئی ٹی دی تعلیم تے توجہ کرݨی چاہیدی اے ، ھک واری جݙاں تساں تعلیم مکمل کرگھنسو تاں تساں دنیا اچ ایں شعبے اچ ہزاراں موقع توں فیدہ چاؤ۔ اے ڳال انہاں اتوار کون اتھاں نیشنل سٹیڈیم اچ سیلانی ویلفیئر انٹرنیشنل ٹرسٹ(ایس ڈبلیوآئی ٹی ) دے زیر اہتمام صدارتی اقدام مصنوعی ذہانت اتے کمپیوٹنگ دے گرینڈ انٹری ٹیسٹ 2022 توں خطاب کریندے ہوئیں آکھی اے ۔ صدر مملکت آکھیے جو پوری دنیا اچ آئی ٹی دے شعبے اچ مہارت رکھݨ آلے 8 کروڑ لوکاں دی لوڑھ اے ،تساں کنے ملازمت دے موقع کائنی بلکہ انٹرپرینیورشپ دے موقع ہوسن ۔ انہاں ݙسایا جو حکومت آئی ٹی دے شعبے کوں ہر قسم دی مدد ݙیندی پئی اے ایں شعبے دی ترقی کوں سوکھا بݨاوݨ کیتے قوانین بݨائے ڳن ۔ڈاکٹر عارف علوی آکھیے جو حکومت ڈیجیٹل اسکل پروگرام جیہے کجھ پروگرام شروع کیتن جیڑھے جو مفت اے تے آن لائن کلاسز دے ذریعے آئی ٹی دی تعلیم ݙیندے پئن ۔ انہاں آکھیے ہزاراں طلباء ایں پروگرام توں فیدہ چا چکن تے ڈالراں اچ کمیندے پئن ، انہاں آکھیے جو آئی ٹی دے شعبے اچ آپݨی تربیت یا تعلیم مکمل کرݨ دے بعد،تساکوں انٹرپرینیورشپ شروع کرݨ کیتے مالی مدد دی لوڑھ تھی سڳدی اے ۔ صدرمملکت آکھیے تساکوں فکر کرݨ دی لوڑھ کائنی کیوں جو حکومت 10 لکھ روپے تئیں مالی مدد کیتے کامیاب جوان پروگرام وی شروع کیتے ۔
