اسلام آباد۔17مئی (اے پی پی) وفاقی کابینہ نیب قوانین اچ ترمیم کیتے وفاقی وزیر قانون دی سربراہی اچ کمیٹی ٻݨاوݨ اتے سول سرونٹس رولز 2020 کوں منسوخ کرݨ اتے انہاں رولز دے تحت سرکاری افسراں دے خلاف شروع کیتی ڳئی کاروائیاں کوں ختم کرݨ دی منظوری ݙے ݙتی اے جڈانجو وزیراعظم کابینہ کوں ݙسیا جو ملک اچ شدید گرمی دی لہر پاروں وزارت ماحولیاتی تبدیلی دے زیرانتظام خصوصی ٹاسک فورس بݨا ݙتی ڳئی اے جیڑھی جو ماحولیاتی تبدیلیاں دے تدارک کیتے کم کریسی۔ منگل کوں وفاقی کابینہ دے اجلاس دے بعد جاری کیتے ڳئے بیان موجب کابینہ اجلاس اچ نیب ترامیم بارے تفصیلی ڳالھ مہاڑ تھئی ۔ ، نیب قوانین اچ ترمیم کیتے وفاقی وزیر قانون دی سربراہی اچ کمیٹی ٻݨاوݨ دی منظوری ݙے ݙتی۔ ایں کمیٹی اچ وکالت، بنکاری، بیوروکریسی اتے ٻئے شعبیاں دی نامور شخصیات شامل کیتی ویسن۔ اسٹیبلشمنٹ ڈویژن ، کابینہ کوں سول سرونٹس (ڈائریکٹری ریٹائرمنٹ فرام سروس) رولز 2020 تے نظر ثانی بارے بݨائی ڳئی کمیٹی دی رپورٹ پیش کیتی۔ کابینہ کمیٹی دی سفارشات منظور کریندیں ہوئیں سول سرونٹس (ڈائریکٹری ریٹائرمنٹ فرام سروس) رولز 2020 کوں منسوخ کرݨ دی منظوری ݙے ݙتی۔ کابینہ ، وزارت خزانہ دی سفارش تے 75 ویں یوم آزادی اتے اسٹیٹ بینک دے قیام دی مناسبت نال یادگاری نوٹ دے ڈیزائن دی منظوری ݙتی۔ ایگرو بیسڈ صنعت دے ودھارے، فصلاں توں پیداوار ودھاوݨ اتے انہاں کوں برآمد کرݨ کیتے کابینہ خصوصی پالیسی ساز کمیٹی ٻݨاوݨ دی منظوری ݙتی۔ وزارت انفارمیشن ٹیکنالوجی تے ٹیلی کام کابینہ کوں سافٹ ویئر برآمدات ودھاوݨ بارے سفارشات پیش کیتی۔ کابینہ اقتصادی رابطہ کمیٹی دے مورخہ16مئی 2022ء کوں تھیوݨ آلے اجلاس اچ ڳھدے ڳئے فیصلیاں دی توثیق کیتی۔
