بھارت مقبوضہ کشمیر اچ انسانی حقوق دی سنگین پامالیاں کریندا پئے، کشمیری رہنماواں کوں کوڑے مقدمات اچ سزا ݙتی ویندی پئی اے، ترجمان دفتر خارجہ

اسلام آباد۔20 مئی(اے پی پی)پاکستان بھارت ولوں مقبوضہ کشمیر اچ انسانی حقوق دی سنگین پامالیاں اتے سینئر کشمیری رہنما محمد یاسین ملک تے 2017ء دے ہک فرضی اتے من گھڑت مقدمہ اچ فرد جرم لاوݨ تے سخت ردعمل ݙتے۔ دفتر خارجہ دے ترجمان آکھیے جو پاکستان اچ بھارت دے ناظم الامور کوں 18 مئی کوں دفتر خارجہ سݙیے اتے انہاں کوں محمد یاسین ملک کوں انتقام دا نشانہ ٻݨاوݨ، فرضہ مقدمہ اچ قید کرݨ اتے فرد جرم لاوݨ تے احتجاج ریکارڈ کرائے۔ یاسین ملک نئی دہلی دی بدنام زمانہ تہاڑ جیل اچ غیر قانونی طور نظربند ہن۔ ہفتہ وار بریفنگ اچ ترجمان آکھیے جو بھارت مقبوضہ کشمیر اچ انسانی حقوق دی سنگین پامالیاں کریندا پئے، کشمیری رہنماواں کوں کوڑے مقدمات اچ سزا ݙتی ویندی پئی اے، ایندا مقصد کشمیری عوام کوں حقیقی قیادت توں محروم کرݨ اے، اقوام متحدہ اتے عالمی ادارے جاگن اتے بھارت ولوں عالمی قوانین اتے سنگین انسانی حقوق دیاں پامالیاں تے کٹہرے اچ ڳھن آون جیندے ثبوت پاکستان پہلے ہی عالمی اداریاں، اتے اقوام متحدہ کوں ڈوزیئر اچ ݙے چکیے۔ کشمیریاں کوں اقوام متحدہ دی قرارداداں دے مطابق حق خودارادیت ݙتا ونڄے۔