وزیراعظم گورنر پنجاب دی تقرری بارے آپݨی ایڈوائس تے نظر ثانی کرن، صدر مملکت ڈاکٹر عارف علوی

اسلام آباد۔21مئی  (اے پی پی) صدر مملکت ڈاکٹر عارف علوی آکھیا جو وزیراعظم گورنر پنجاب دی تقرری بارے  آپݨی ایڈوائس تے نظر ثانی کرن۔ چھݨ چھݨ کوں ایوان صدر دے پریس ونگ توں جاری بیان موجب صدرمملکت وزیراعظم کوں جواب اچ آکھیا جو عمر سرفراز چیمہ ہݨ وی گورنر دے عہدے تے ہن، نویں تقرری دا کوئی جواز کائنی، آئین دے آرٹیکل 101(2) دے تحت ”گورنر صدر دی خوشنودی تئیں عہدے تے رہسن۔ اڄوکے ملک دے حالات دا تقاضا اے جو اڄوکے گورنر آپݨے عہدے تے رہون، گورنر پنجاب دے خط اتے رپورٹ دے مطابق وزیراعلیٰ دے چݨاؤ اچ پنجاب اسمبلی دے ارکان دی وفاداریاں بدلی ڳئ۔ پنجاب اچ غیر قانونی طریقے نال اکثریت ڳھن تے آئین دے آرٹیکل 63 اے دی خلاف ورزی کیتی ڳئی اے، صدارتی ریفرنس تے سپریم کورٹ دے 17 مئی دے  فیصلے نال گورنر دے اصولی موقف دی توثیق تھئی اے۔ صدر مملکت آکھیا جو الیکشن کمیشن دے 20 مئی دے فیصلے نال وی گورنر پنجاب دا موقف ٻیا مستحکم تھیے۔ الیکشن کمیشن دے فیصلے دے مطابق منحرف تھیوݨ آلے 25 ایم پی اے پنجاب اسمبلی دے رکن کائنی۔ انہاں آکھیا جو وزیراعظم آئین دے آرٹیکل 48(1) دے مطابق نویوں گورنر دی تقرری دی ایڈوائس تے نظر ثانی کرن۔