اسلام آباد۔ 27 مئی( اے پی پی) وزیر خارجہ بلاول بھٹو زرداری پاک امریکا کشیدگی مکاوݨ کوں اہم قرار ݙیندے آکھیے جو ساکوں اپݨیاں ماضی دیاں غلطیاں تؤں سبق سیکھݨا چاہیدے۔ امریکی اخبار کوں انٹرویو اچ انہاں آکھیا جو ݙوہیں ملکاں دے تعلقات کوں ٻیا خراب تھیوݨ ݙیوݨا سیاݨا پن نا ہوسی، ساݙے جیویں اڄوکے تعلقات رہین اے پاکستان اتے امریکا ݙوہیں ملکاں اتے ایندے عوام دے مفاد اچ نئیں، یقین اے جیڑھے معاملیاں تے ݙوہین ملکآں وچال ودھ اتفاق اے او تیکھے اڳو تے ودھسن، کجھ اختلاف ہین تاں انہاں کوں باہمی احترام نال نمٹایا ویسی۔ انہاں آکھیا جو اتحادی حکومت دا حصہ ٻݨݨ ایویں اے جیویں امریکا اچ ٹرمپ اتے کلنٹن ٹبراں دا ہک تھیوݨ۔ میں انقلاب دے بجائے ارتقا تے یقین رکھداں۔ امریکا اتے پاکستان کوں اپݨے مثبت تعلقات تے جذبات کوں حاوی نئیں تھیوݨ ݙیوݨا چاہیدا۔ انہاں آکھیا جو امریکا اتے پاکستان چاہندن جو اپݨے رویے ٹھیک کرتے افغان عوام کیتے ملک اچ استحکام سانڳے طالبان حکومت دی حوصلہ افزائی کیتی ونڄے۔
