اسلام آباد۔28مئی (اے پی پی) وفاقی وزیر منصوبہ بندی ، ترقی ، اصلاحات و خصوصی اقدامات پروفیسر احسن اقبال آکھیے جو صوبائی حکومتاں نال رل تے ملک اچ سپورٹس کمپلیکسز تعمیر کرݨ دا منصوبہ بݨیندے پیوں ،عالمی اولمپک ایسو سی ایشن دے تعاون توں سپورٹس فیڈریشناں اچ شفافیت گھن آئی ویی ۔ اے ڳالھ انہاں آپݨی زیر صدارت نینگراں تے کھیݙ دے حوالے نال کیتے ونڄݨ آلے اقدامات تے اجلاس اچ ڳالھ مہاڑ کریندے ہوئیں آکھی اے ۔ اجلاس اچ معاون خصوصی یوتھ افئیرز ، چئیرمین ہائیر ایجوکیشن کمیشن ، نیو ٹیک اتے وزارت بین الصوبائی ہم آہنگی دے افسران شرکت کیتی۔ وفاقی وزیر آکھیے جو حکومت نینگراں کیتے بجٹ اچ خصوصی پروگرام شروع کریندی پئی اے ، صوبائی حکومتاں دے نال رل تے پورے ملک اچ سپورٹس کمپلیکسز تعمیر کرݨ دا منصوبہ بݨیندے پیوں ، گزریل حکومت سپورٹس دے منصوبے تباہ کیتے ۔ انہاں آکھیے جو اولمپک کھیݙاں اچ ناقص کارکردگی تے پاکستان اولمپک ایسوسی ایشن دی جواب طلبی ہووݨی چاہیدی اے ، عالمی اولمپک ایسوسی ایشن دے تعاون توں سپورٹس فیڈریشناں اچ شفافیت گھن آئی ویسی۔
