پاکستان اتے جرمنی دا تجارت سودھا ٻئے شعبیاں اچ ڳانݙھا ودھاوݨ تے اتفاق

اسلام آباد۔07 جون(اے پی پی)وزیر خارجہ بلاول بھٹو اتے جرمن ہم منصب اینالینا باربیک اسلام آباد اچ ملین اتے انہاں ݙوہاں ملکاں وچال تجارت، معیشت سودھا ٻئے اہم شعبیاں اچ تعاون ودھاوݨ تے اتفاق کیتے اتے افغانستان، خطے اتے عالمی صورتحال تے وی الائے۔ ملݨ توں بعد اسلام آباد اچ جرمن ہم منصب اینالینا باربیک نال پریس کانفرنس کریندے بلاول بھٹو آکھیا جو جرمنی پاکستان دا وݙا تجارتی شراکت دار اتے ستواں وݙا انویسٹر اے، ݙوہاں ملکاں 2.5 ارب ڈالر دی تجارت کیتی اے۔ انہاں آکھیا جو پاکستان، روس یوکرین جھیڑا مذاکرات نال حل کرݨ دا حمایتی اے، مسئلہ کشمیر دا حل وی اقوام متحدہ دی قرارداداں دے مطابق ہووݨا چاہیدے۔ انہاں بی جے پی رہنما دے گستاخانہ بیان دی مذمت کریندے آکھیے جو بھارت کوں ایں معاملے تے معافی منڳݨی ہوسی۔ انہان افغان مسلے دے حل تے زور ݙیندے خطے اچ امن کیتے عالمی برادری کوں افغانستان بارے کردار ادا کرݨ دا آکھیے۔ جرمن وزیر خارجہ پاکستان نال ہر ممکن تعاون دی یقین دہانی کریندے آکھیا جو جرمنی پاکستان نال ڳانڈھا ودھاوݨ چاہندے۔