گرے لسٹ توں نکلݨ پاکستان دی وݙی کامیابی ہوسی، جی ایس پی پلس نال ملکی برآمدات ودھاوݨ اچ مدد ملسی، وفاقی وزیر برائے منصوبہ بندی تے ترقی احسن اقبال دی کابینہ کمیٹی دے اجلاس دے بعد میڈیا بریفنگ

اسلام آباد۔21جون(اے پی پی) وفاقی وزیر برائے منصوبہ بندی ترقی تے اصلاحات وخصوصی اقدامات احسن اقبال آکھیا جو گرے لسٹ توں نکلݨ پاکستان دی وݙی کامیابی ہوسی، جی ایس پی پلس نال ملکی برآمدات ودھاوݨ اچ مدد ملسی۔ گزریل حکومت دے غیر ذمہ دارانہ فیصلیاں پارون ملک دا ضیان تھیے۔ اے ڳالھیں انہاں منگل کوں کابینہ کمیٹی دے اجلاس دےبعد میڈیا کوں بریفنگ ݙیندیں ہوئیں آکھی۔ انہاں آکھیاجو فیٹف اچ گرےلسٹ توں وائٹ لسٹ اچ ونجݨ دا راہ سوکھا تھی ڳئے۔ آرمی چیف دی نگرانی اچ ہک سیل ٻݨایا ڳیا ہئی، آرمی چیف دی کوششاں دی تعریف کیتی ڳئی اے۔ انہاں آکھیا جو وزیرخارجہ اتے وزیر مملکت خارجہ کابینہ کوں فیٹف تے بریفنگ ݙتی اے۔ انہاں آکھیا جو انڈونیشیا توں خوردنی تیل درآمد کیتا ویندا پئے۔ خوردنی تیل بارے کابینہ کوں اعتماد اچ ڳھدا ڳئے۔ انڈونیشیا توں خوردنی تیل تے جہاز امدے پئن۔ وزارت صنعت دی پوری ٹیم کوں ایں کوشش تے مبارخ ݙیندوں۔ کابینہ دے اجلاس اچ ملک اچ یوریا دی دستیابی بارے بریف کیتا ڳئے۔ وزیراعظم یوریا دی دستیابی یقینی ٻݨاوݨ دی ہدایت کیتی اے۔ احسن اقبال آکھیا جو گزریل دور اچ دوائیں دے نرخ ٻہوں ودھین، دوائیں دے نرخ ڳھٹ کرݨ کیتے کم کریندے پیوں۔ انہاں آکھیا جو جی ایس پی پلس بارےکابینہ کوں بریفنگ ݙتی ڳئی اے۔ گزریل حکومت آئی ایم ایف نال کیتے ڳئے معاہدیاں تے عمل نہ کیتا۔ اساں سیاست تے ملکی فائدے کوں ترجیح ݙتی اے۔ ملک کوں معاشی انتشار توں بچاوݨ کیتے اوکھے فیصلے کیتےڳئے۔ اگلا سال ملکی استحکام دا اے۔ انہاں آکھیا جو تحریک انصاف دی ممنوعہ فنڈنگ دا فیصلہ جلدی سݨایا ویسی۔ ممنوعہ فنڈنگ آئین اتے قانون دے خلاف اے۔ عمران خان دی رضامندی نال ممنوعہ فنڈنگ حاصل تھیندی رہی اے۔ انہاں آکھیا جو پٹرولیم مصنوعات دے نرخاں اچ ودھارا عالمی منڈی نال جڑیا ہوئے۔ گلگت اتے بلتستان کوں اوندا پورا حق ݙتا ویسی۔