ٻاہرلے ملک پاکستانیاں ھکے ݙینھ اچ 57 ملین ڈالروطن بھیج تے نواں ریکارڈ بݨا ݙتے ، وزیراعظم شہباز شریف

اسلام آباد۔22جون  (اے پی پی):وزیراعظم شہباز شریف آکھیے جو ٻاہرلے ملک پاکستانیاں ھکے ݙینھ اچ 57 ملین  ڈالروطن بھیج تے نواں ریکارڈ بݨا ݙتے ، روشن ڈیجیٹل اکائونٹ اچ جمع کرائی ونڄݨ آلی رقم 4.5 ارب ڈالر توں ودھ ڳئی اے ۔ وزیراعظم آفس دے میڈیا ونگ توں جاری بیان تے وزیراعظم دے ٹویٹ موجب وزیراعظم شہبازشریف ھکے ݙینھ اچ ریکارڈ57 ملین ڈالر پاکستان بھجواوݨ تے ٻاہرلے ملک پاکستانیاں کوں خراج تحسین پیش کیتے اتے انہاں دا شکریہ ادا کیتے ۔ انہاں آکھیے جوگزریل ݙینھ ھکے ݙینھ اچ ساریں توں ودھ 57 ملین ڈالر سٹیٹ بینک کوں ملئن۔ اے رقم ٻاہرلے ملک پاکستانیاں دی طرفوں ھکے ݙینھ اچ بھجوائی ونڄݨ آلی ہݨ تئیں دی ساریں توں ودھ رقم اے ۔ ھک ݙینھ اچ آوݨ آلی ایں رقم دےبعد روشن ڈیجیٹل اکائونٹ اچ جمع کرائی ونڄݨ آلی رقم دا حجم 4.5 ارب ڈالرتوں ودھ ڳئے ۔ انہاں آکھیے ساݙی حکومت روشن ڈیجیٹل اکائونٹ سکیم دی مکمل حمایت تے سرپرستی کریندی پئی اے ۔ ھک ݙینھ اچ ریکارڈ رقم بھجواوݨ تے ٻاہرلے ملک پاکستانیاں دا شکریہ ادا کریندن۔ وزیراعظم آکھیے ٻاہرلے ملک پاکستانی ساݙا قیمتی اثاثہ ہن جنہاں دے دل پاکستان دی محبت اچ دھڑکدن ، ٻاہرلے ملک پاکستانی غیرملکی زرمبادلہ دے ذریعے ہمیشہ ملکی معیشت دی مضبوطی اتے بہتری اچ کردار ادا کریندن ، تساں نال وعدہ اے جو موجودہ معاشی مشکلات دے بھنور توں نکل تے تساݙیاں امیداں تے توقعات تے پورے لہسوں۔