اسلام آباد۔1جولائی (اے پی پی):چیئرمین سینیٹ صادق سنجرانی آکھیے پاکستان افریقی ملکاں دے نال تعلقات کوں مزید ودھاوݨ چاہندے، کاروباری شعبیں اچ وفد دے تبادلیں دے ذریعے تجارت تے سرمایہ کاری دے مواقع تلاش کیتے ونڄ سڳدن ۔ پریس ریلیز دے مطابق اے ڳالھ انہاں آذربائیجان اچ غیرجانبدار تحریک دی پارلیمانی نیٹ ورک کانفرنس دے موقع تے مختلف ملکاں دے مندوبین تے پارلیمانی سربراہان نال ملاقاتاں اچ آکھی اے ، انہاں افریقی ملکان دے سرمایہ کاراں کوں آپݨے پاکستانی ہم منصباں نال رل تے سرمایہ کاری دے موقع تلاش کرݨ تے زور ݙتا ۔ آذربائیجان اچ چیئرمین سینیٹ نال ملاقات کرݨ آلیں وچ الجیریا دے سپیکر ابراہیم بوغالی، گیمبیا دے ڈپٹی سپیکر سیڈی اینجی اتے لیبیا دے ڈپٹی سپیکر فوزی سلیم شامل ہن ، چیئرمین سینیٹ ایں نوعیت دیاں کانفرنساں دی اہمیت کوں چاتا ۔انہاں آکھیے امن تے ترقی کیتے پارلیماناں تے باری ذمہ واری لڳدی اے ۔
