اڄوکے چھل پاروں تباہی اساݙا جیوݨ بدل ݙتے، جڳ کوں ہتھ ونڈاوݨ کیتے طویل المدتی اقدامات کرݨے پوسن، بھارت خطے دا امن دا تے نہ لاوے، فلسطین اتے افغانستان دے مسئلے تے اکھیں نی مندریاں چاہیدیاں، اسلاموفوبیا نال رَل تے نبڑݨاں پوسی، وزیراعظم شہباز شریف دا اقوام متحدہ دی جنرل اسمبلی دے 77 ویں اجلاس توں خطاب

نیویارک۔23ستمبر (اے پی پی) وزیراعظم شہباز شریف آکھیے جو ماحولیاتی تبدیلی تے پاکستان ودھ متاثر تھیندا پئے، اڄوکے چھل پاروں جیڑھی تباہی تھئی اے اوں سارا جیوݨ بدل ݙتے، وݙے پیمانے تے تھیوݨ آلے جانی تے مالی ضیان دی بھرائی کیتے طویل المدتی اقدمات کیتے جڳ کوں نال تھیوݨا پوسی، بھارت خطے دے امن کوں دا تے نا لاوے اتے کشمیریاں کوں اقوام متحدہ دی قرارداداں دے مطابق حق خودارادیت ݙتا ونڄے، افغانستان کوں کلھا کرݨ نال مسئلے تے محرومیاں ودھسن، مسئلہ فلسطین کیتے وی جڳ کوں بھرپور کردار ادا کرݨا چاہیدے۔ اے ڳالھیں انہاں اقوام متحدہ دی جنرل اسمبلی دے 77 ویں اجلاس اچ خطاب کریندیں ہوئیں آکھی۔ وزیراعظم آکھیا جو میں اڄ پاکستان اچ آوݨ آلے چھل پاروں تھیوݨ آلی تباہی دا ݙکھڑا سݨاوݨ آیاں، جتھاں 40 ݙینھ تے40 رات چھل آندا رہیے، ایں آفت نال ترائے کروڑ 30 لکھ لوک متاثر تھین، اڄ ملک دا وݙا حصہ پاݨٰی اچ بݙیا پئے، 1500 لوک موئن، ݙاہ لکھ زناور ہلاک تھین ،ترائے سو ستر پل، اتے 13 ہزار کلومیٹر سڑکاں متاثر تھین، انہاں آکھے جو پاکستان اوں ماحولیاتی تبدیلی پاروں متاثر تھیندا پئے، جیندے اچ اوندا ہک فیصد توں وی ڳھٹ حصہ اے اتے اساکوں گلوبل وارمنگ دی قیمت ادا کرݨی پوندی پئی اے، انہاں چھل دا نقصان ݙسیندیں ہوئیں آکھے جو ہک کروڑ ݙاہ لکھ لوک غربت دی ہلکیر توں تلے تھی ڳئن، ریسکیو اتے ریلیف آپریشن جاری اے، بی ایس پی دے تحت ستر ارب روپے ݙیندے پئے ہیں، ڄݙانجو ترقیاتی فنڈز دا وݙا حصہ وی چھل متاثرین کیتے رکھیا ڳئے۔ وزیراعظم چھل متاثرین دی امداد کیتے عالمی کردار دی تعریف کریندیں ہوئیں آکھیے جو اے نقصان اتنا وݙا اے جیکر جڳ سارا ہتھ ونڈاوݨ اچ دیر کیتی تاں ہک المیہ سامݨے آسڳدے جیڑھا جو چھل متاثرین دی بحالی اتے تعمیر نو ہک وݙا چیلنج اے۔ وزیراعظم آکھے جو اڄ قومی سلامتی دی تاریخ بدل ڳئی اے، اساں بھارت سودھا سارے ملکاں نال چنڳے تعلقات چاہندوں ، بھارت جڳ دا امن دا تے لاوݨ تے تلیا ہوئیے، بھارت غیر قانونی طور تے کشمیریاں کوں اقلیت اچ بدلݨ چاہندے اتے پنجوی لکھ غیر کشمیریاں کوں مقبوضہ علاقے اچ آباد کیتا ڳئے، اساں ہمسائے ہیں جیڑھے ہمیشہ ہمسائے رہسوں، جنگ کہیں مسئلے دا حل کائنی۔ ایں کیتے مذاکرات کرݨے پوسن، بھارت پنڄ اگست 2019 دے ہک پاسہ اقدامات کوں واپسی ڳھنے۔ وزیراعظم آکھیے جو افغانستان کوں کلھا چھوڑݨ نادانی ہوسی ، افغان عوام نال یکجہتی اتے منجمد اثاثے بحال کرݨے پوسن۔انہاں آکھیا جو دہشت گردی اتے منشیات دی سمگلنگ روکݨ کیتے اقدامات دی لوڑھ اے۔ وزیراعظم آکھیا جو اسلاموفوبیا ہک عالمی مسئلہ اے جیندے نال نبڑݨ کیتے اقوام متحدہ اتے رکن ملکاں کوں ٹھوس اقدامات کرݨے چاہیدن۔ انہاں مسئلہ فلسطین دے فوری حل تے وی زور ݙتا۔