پی ٹی آئی سپریم کورٹ دی تعین کیتی ڳئی جاہ تے احتجاج ریکارڈ کراوݨ چاہندی اے تاں حکومت تعاون کریسی ،مسلح جتھیں دی صورت اچ ریاست تے چڑھائی کیتی تاں اینکوں ہر صورت روکیا ویسی ، رانا ثنااللہ دی پریس کانفرنس

لاہور۔24ستمبر (اے پی پی):پاکستان مسلم لیگ ن پنجاب دے صدرووفاقی وزیر داخلہ رانا ثنااللہ خان آکھیے جے پی ٹی آئی سپریم کورٹ تے ہائی کورٹ دی تعین کیتی ڳئی جاہ تے آپݨا احتجاج ریکارڈ کراوݨ چاہندی اے تاں حکومت مکمل تعاون کریسی لیکن جے اوں مسلح جتھیں دی صورت اچ ریڈزون تے ریاست تے چڑھائی کرݨ دی کوشش کیتی تاں وفاقی حکومت اینکوں ہر صورت روکیسی ، آرمی چیف دی تعنیاتی آئین و قانون دے مطابق تھیسی ،پنجاب اچ تبدیلی گھن آوݨ کوئی اوکھا کائنی پرویز الہی جیں نمبر دے نال وزیراعلی بݨیے، او ݙو ترائے ووٹ ایݙے اوݙے تھیوݨ توں تبدیلی آسڳدی اے ، پی ٹی آئی دے پندراں لوک رابطے اچ ہن ، پنجاب اچ گورنر راج دا فیصلہ کابینہ کرݨا اے، عمران خان ملک کوں ناکام کرݨ دیاں کوششاں اچ لڳیا ہویا اے ، شوکت ترین دا بطور پاکستانی کردار ٻہوں شرمناک اے، عمران خان ایں تے ھک لفظ تئیں نی ٻولیا، پنجاب حکومت دا جیڑھا رویہ اے ،ایندے وچ آئینی و سیاسی تبدیلی ناگزیر تھی چکی اے ، اسحاق ڈار آندے ہفتے پاکستان آندے پئن تے معاشی ٹیم کوں لیڈ کریسن ،نوازشریف دی ہدایت تے پارٹی دی تنظیم سازی دا عمل جاری اے، پارٹی نوازشریف کوں درخواست کیتی اے جو آندے انتخابات اچ پارٹی کوں لیڈ کرن ، او ہفتے دے ݙینھ 180H ماڈل ٹائون لاہور اچ پریس کانفرنس توں خطاب کریندے پئے ہن ، عظمی بخاری،خلیل طاہر سندھو اتے ٻئے پارٹی رہنما وی ایں موقع تے موجود ہن۔رانا ثناء اللہ خان آکھیے اڄ ن لیگ پنجاب دا تنظیمی اجلاس تھیسی ،بعد اچ صوبائی حلقہ دی سطح تئیں تنظیم کوں مکمل کرتے ڈویژنل کنونشن منعقد کیتے ویسن۔انہاں آکھیے پارٹی کوں یونین کونسل تئیں مکمل کریسوں ،چار ہزار یونین کونسل دی تنظیم مکمل تھی چکی اے ،مریم نواز تے حمزہ شہباز پنجاب دے سارے ضلعیں دے دورے کریسن جیں توں 2023 اچ پارٹی کوں بہتر فیصلے کیتے مواد میسر تھیسی ، پندرہ اکتوبر توں تنظیم سازی شروع کرتے دسمبر تئیں مکمل کریسوں ۔انہاں آکھیے ایں ڳالھ اچ کوئی شک کائنی جو مہانگ کوں کنٹرول نی کیتا ونڄ سڳیا جیڑھا ساݙا دعوی ہئی ‘جیویں ہی آئی ایم ایف دا معاہد تھی ویسی تاں وختی ریلیف ݙیسوں ،لیکن آئی ایم ایف معاہدے اچ تاخیرعمران خان دی ملک دشمن پالیسی رہی،عمران خان ویندے ویندے آئی ایم ایف معاہدے دی خلاف ورزی کیتی جیں توں او کوڑیج ڳئے ،جے معاہدہ نہ تھیندا یا اوکھے فیصلے نہ کریندے خود سیاست بچیندے تاں ملک کوں ناقابل تلافی ضیان تھیندا تے ملک ڈیفالٹ کرویندا لیکن اوکھے فیصلیں توں ساݙا سیاسی ضیان تھیا تے مہانگ تھئی ۔انہاں آکھیے تساں فرح گوگی، قادر ٹرسٹ تے 50 ارب روپے یو کے توں آئے کیا ایں معرکہ توں پی ٹی آئی پاپولر تھئی ؟ ۔رانا ثنااللہ آکھیے سیلاب دی جیڑھی آفت آئی، اوں ساݙی مشکلات کوں ودھایا جیں تے شہبازشریف دنیا نال ڈائیلاگ کیتا،سیلاب دیاں تباہ کاریاں دی وجہ ماحولیاتی تبدیلیاں ہن جیڑھا جو کہیں صوبے دی غلطی کائنی ۔