اسلام آباد۔6اکتوبر (اے پی پی):وزیراعظم دے مشیر فیصل کریم کنڈی سرائیکی صوبے اچ رلݨ کیتے ٹانک تے دیرہ اسماعیل خان دے لوکاں کوں جمہوری انداز اچ انہاں دا حق ݙیوݨ دا مطالبہ کیتے ۔اے پی پی سرائیکی سروس نال الیندے ہوئیں فیصل کریم کنڈی آکھیے جو ٹانک تے دیرہ اسماعیل خان دے لوکاں کوں سرائیکی صوبے اچ رلݨ دی وݙی سک اے ۔ ایں سانڳے لوکاں دی رائے گھنݨ کیتے ریفرنڈم یا ایہو جیہاں ٻیا کوئی جمہوری طریقہ کار اپناوݨ دی لوڑھ اے۔انہاں آکھیے جو سرائیکی صوبے کیتے پاکستان پیپلز پارٹی ساریں توں ودھ کوشش کیتی اے۔جیکر میں پشتون ہووݨ دے باوجود سرائیکیں دامقدمہ لڑداں تاں ایندی وجہ علاقے دی نمائندگی اتے ووٹ دا حق ادا کرینداں۔انہاں آکھیے سرائیکی صوبے اتے ایندے اچ رلݨ کیتے کہیں تے کوئی وی اعتراض نی ہووݨاں چاہیدا ساݙا موقف اے جو فیصلے جمہوری انداز اچ تھیوݨے چاہیدن۔
