سپیکر و ڈپٹی سپیکر قومی اسمبلی دا سانحہ آرمی پبلک سکول پشاور دے شہداء دیاں قربانیاں کوں خراج عقیدت پیش

اسلام آباد۔16دسمبر(اے پی پی) اسپیکر و ڈپٹی اسپیکر قومی اسمبلی سانحہ آرمی پبلک سکول پشاور اچ شہید تھیوݨ آلے ٻالاں تے استاداں دیاں قربانیاں کوں خراج عقیدت پیش کریندے ہوئیں آکھیے جو سانحہ آرمی پبلک سکول دا درد قوم دے دل اچ شروع ݙینھ وانڳوں تازہ اے ۔ آپݨے ھک بیان اچ سپیکر آکھیے سانحہ آرمی پبلک سکول پشاور اچ شہید تھیوݨ آلے ٻالاں تے استاداں دیاں قربانیاں کوں ہمیشہ یاد رکھیا ویسی ،آرمی پبلک سکول دے شہداء دیاں قربانیاں کوں کݙاہیں بھلایا نہ ویسی ،16 دسمبر 2014 دا ݙینھ ملک دی تاریخ اچ سیاہ ݙینھ دے طور تے یاد رکھیا ویسی ۔ 16 دسمبر دے دلخراش واقعے پورے ملک کوں ہلا تے رکھ ݙتا ہئی ، آرمی پبلک سکول دے نشوم ہیروز دیاں قربانیاں ملکی تاریخ اچ ہمیشہ یاد رکھیاں ویسن ۔ میکوں انہاں خانداناں تے فخر اے جنہاں ایں عظیم ݙکھ کوں برداشت کیتے ،پوری قوم اُنہاں ݙکھی خانداناں دے ݙکھ اچ برابر دی شریک اے ۔راجہ پرویز اشرف آکھیے سانحہ اے پی ایس پوری قوم کوں دہشت گردی دے خلاف ھک مٹھ کیتا ، پاکستان دی مسلح افواج پوری قوم دی مدد نال دہشتگردی کوں منڈھوں مکاوݨ دا اعادہ کیتے،جیں دے نتیجے اچ اڄ ملک توں کافی حد تئیں دہشت گردی مک ڳئی اے ،دہشتگردی دے خلاف جنگ اچ ساݙی مسلح افواج لازوال قربانیاں ݙتن ۔ڈپٹی اسپیکر زاہد اکرم درانی سانحہ اے پی ایس دے ہیروز کوں خراجِ تحسین پیش کریندے ہوئیں آکھیے جو اڄ دا ݙینھ ایں ݙراوݨے ݙینھ دی یاد ݙویندے ،سانحہ آرمی پبلک سکول دا درد اڄ وی ساݙے دلاں اچ تازہ اے ۔