کرغزستان تے پاکستان وچال تجارتی موقع توں فیدہ چاوݨ دی لوڑھ اے ، کرغز سفیر

اسلام آباد۔23دسمبر(اے پی پی) پاکستان اچ کرغزستان دے سفیر اولان بیک توتوئیف ݙوہیں ملکاں وچال موجود وسیع تجارتی موقع توں فیدہ چاوݨ تے موجودہ اقتصادی تعلقات کوں مزید مستحکم کرݨ دی لوڑھ تے زور ݙتا ۔ کرغزستان ٹریڈ ہائوس دے افتتاح دے موقع تے میڈیا نال ڳالھ مہاڑ کریندے ہوئیں انہاں آکھیے جو وکھو وکھ شعبیں اچ پاکستانی خریداراں تے سرمایہ کاراں دی توجہ کراوݨ کیتے اتھاں کرغزستان دی مصنوعات دی نمائش کیتی ویسی ، پاکستان اتے کرغزستان وچال خوشگوار تعلقات قائم ہن لیکن موجودہ ݙوطرفہ تجارت 8 توں 9 ملین ڈالر اے جیڑھی جو انہاں دی حقیقی صلاحیت توں ٻہوں گھٹ اے ، ݙوہیں ملک محدود شعبیں اچ تجارت کریندے پئن جیں کوں ودھاوݨ کیتے انہاں کوں شعبیں اچ تجارت ودھاوݨ تے توجہ ݙیوݨ دی لوڑھ اے۔ انہاں آکھیے کرغزستان اڄوکے سال پاکستان کوں کولا برآمد کیتا تے قدرتی وسائل توں مالا مال ملک ہووݨ دی وجہ توں پاکستان کوں مزید مصنوعات ݙے سڳدے جݙاں جو پاکستان توں کرغزستان کوں فارماسیوٹیکل، ٹیکسٹائل اتے زرعی مصنوعات سودھے ٻہوں ساریاں چیزاں برآمد کیتیاں ونڄ سڳدن ۔ انہاں آکھیے کرغزستان بھارت توں ماربل درآمد کریندا پئے تے پاکستانی ماربل ایکسپورٹرز وی ایں مارکیٹ توں فیدہ چا سڳدن ۔ سفیر آکھیے چین۔ کرغزستان ۔ازبکستان ریلوے منصوبے کوں مستقبل اچ افغانستان دے رستے پشاور تئیں ودھایا ویسی جیڑھا جو تجارتی تعلقات کوں ودھاوݨ اچ مددگار ثابت تھیسی ۔