دہشت گردی دے ناسور کوں کچل ݙتا ویسی ، ارباں روپے دے ترقیاتی منصوبے جنوبی خیبرپختونخوا تے ڈیرہ اسماعیل خان اچ ترقی و خوشحالی آسی ، وزیراعظم شہباز شریف دا تقریب توں خطاب

ڈیرہ اسماعیل خان۔26دسمبر(اے پی پی) وزیراعظم شہباز شریف آکھیے دہشت گردی ملک کیتے فتنہ اتے ناسور اے اینکوں کچل ݙتا ویسی ، گھڑی چور ملک کوں دنیا اچ بدنام کیتا، معیشت دا ٻیڑہ غرق کر ݙتا تے دوست ملکاں دے نال تعلقات خراب کیتے، خیبرپختونخوااچ سیلاب توں تباہی سابق حکومت دی غلط منصوبہ بندی دی وجہ توں تھئی ، عمران نیازی دی غلط پالیسیاں دی وجہ توں ملک دیوالیہ تھیوݨ دے نیڑے ہئی مخلوط حکومت دیوالیہ تھیوݨ توں بچا ڳھدا ، عوام پریشان نہ تھیوے ملک کوں اوکھ توں کڈھیسوں ، سیلاب متاثرین دی گھراں اچ آبادکاری تئیں آرام دے نال نہ ٻہسوں ، ارباں روپے دے ترقیاتی منصوبیں توں جنوبی خیبرپختونخوا اتے ڈیرہ اسماعیل خان اچ ترقی و خوشحالی آسی ۔ اے ڳالھ انہاں مختلف ترقیاتی منصوبیں دے سنگ بنیاد اتے افتتاح دے موقع تے تقریب توں خطاب کریندے ہوئیں آکھی اے ۔ تقریب اچ جمعیت علمائے اسلام (ف) دے امیر اتے پی ڈی ایم دے سربراہ مولانا فضل الرحمان، گورنر خیبرپختونخوا حاجی غلام علی، وفاقی وزیر منصوبہ بندی و ترقی احسن اقبال، وفاقی وزیر ہائوسنگ و تعمیرات مولانا عبدالواسع، وفاقی وزیر مذہبی امور مفتی عبدالشکور، وفاقی وزیر مواصلات اسعد محمود، وفاقی وزیر اطلاعات و نشریات مریم اورنگزیب، وزیراعظم دے مشیر انجینئر امیر مقام، ڈپٹی سپیکر قومی اسمبلی زاہد اکرم درانی سودھے اعلیٰ سرکاری افسران اتے عمائدین علاقہ شرکت کیتی۔ وزیراعظم آکھیے دہشت گردی دا فتنہ ولا سر چیندا پئے ، بنوں اچ دلخراش واقعہ پیش آیا لیکن قانون نافذ کرݨ آلے اداریں دے اہلکاراں اتے کمانڈو افسران اتے جواناں آپریشن کیتا، آپریشن اچ حصہ گھنݨ آلے افسران اتے جواناں کوں خراج تحسین پیش کریندوں ۔ ایں واقعہ اچ شہید تھیوݨ آلے افسران اتے اہلکار ساݙے ہیرو ہن، انہاں دی قربانی ہمیشہ یاد رکھی ویسی ۔ انہاں جرات تے بہادری دی شاندار تاریخ رقم کیتی اے ، واقعہ اچ زخمی تھیوݨ آلے افسران اتے جواناں دی ہسپتال اچ خیریت پچھی اے، انہاں جرات، بہادری اتے بھرپور عزم دا مظاہرہ کیتے ، ھک فوجی افسر چھٹی تے ہووݨ دے باوجود رضاکارانہ طور تے آپریشن اچ حصہ ڳھدا، انہاں دی جرات، بہادری اتے عزم قابل تحسین اے، بلوچستان اچ وی ھک واقعہ پیش آئے ، ایں معاملے تےاجلاس سݙیا ڳئے انہاں واقعات کوں روکݨ دہشت گردی دے ناسور کوں منڈھوں مکاوݨ کیتے کوئی کسر نہ چھوڑی ویسی ۔ وفاقی و صوبائی حکومتاں ادارے رل تے بھتہ خوری، اغواء اتے دہشت گردی دے فتنے کوں مکا ݙیسن۔ وزیراعظم آکھیے او ایں علاقے اچ کجھ مہینے جݙاں آئے ہن تاں ہر پاسے پاݨی ہی پاݨی ہا، سیلاب توں ٻہوں تباہی تھئی لیکن اڄ اتھاں ترقی و خوشحالی دے منصوبیں دا سنگ بنیاد رکھیا ڳئے ، سیلاب توں نوشہرہ، چارسدہ، کالام، کوہستان، ڈیرہ اسماعیل خان اتے ٹانک اچ ٻہوں ضیان تھئے ۔ وزیراعظم آکھیے وفاقی تے صوبائی اداریں ݙینھ رات سیلاب متاثرین دی مدد کیتے اقدامات کیتے 85 ارب روپے دی رقم سیلاب متاثرین اچ 25، 25 ہزار روپے فی خاندان دے حساب نال ݙتے ڳئن متاثرین کوں کمبل، خیمے اتے دوائیں وی ݙتیاں ڳئن ، ݙوجھے ملکاں مدد کیتی لیکن سیلاب متاثرین کیتے وسائل جتنے وی خرچ کروں گھٹ ہن ، 9 جنوری کوں جنیوا اچ ڈونرز کانفرنس تھیندی پئی اے اتھاں دنیا کوں ݙسیسوں گیساں دے اخراج اچ پاکستان دا حصہ ھک فیصد توں وی گھٹ اے تے ٻہوں تباہی تھئی اے ساݙی وجہ توں نی تھئی ۔ وزیراعظم آکھیے سیلاب متاثرین دی امداد و بحالی کیتے وفاقی و صوبائی حکومتاں، مسلح افواج، وزارت بجلی اتے ٻئے اداریں جیویں بھرپور طریقے نال کم کیتے انہاں کوں خراج تحسین پیش کریندوں ۔