ے نظیر بھٹو اپݨے ناں وانڳوں بے نظیر ہن، او چھیکڑی ساہ تئیں وفاق دی زنجیر بݨ تے پاکستان دے اتحاد، ترقی اتے خوشحالی کیتے برسرپیکاررہیاں، وفاقی وزیر اطلاعات مریم اورنگزیب دا بے نظیر بھٹو دے یوم شہادت تے خراج عقیدت

اسلام آباد۔27دسمبر(اے پی پی) وفاقی وزیر اطلاعات و نشریات مریم اورنگزیب سابق وزیراعظم اتے پاکستان پیپلز پارٹی دی چیئرپرسن محترمہ بے نظیر بھٹو کوں انہاں دے شہادت دے ݙٰنھ تے خراج عقیدت پیش کریندے ہوئیں آکھیے جو بے نظیر بھٹو شہید اپݨے ناں وانڳوں بے نظیر ہن ، انہاں صبر آزما حالات اچ وی ھک بہادر دھی، ما، اہلیہ اتے بھیݨ دے رشتے وݙائی تے جرات نال نبھائے ، بےنظیر بھٹو سیاست اچ تدبر، بہادری اتے جدوجہد دی روشن مثال ہن، او چھیکڑی ساہ تئیں وفاق دی زنجیر بݨ تے پاکستان دے اتحاد، ترقی تے خوشحالی کیتے برسرپیکار رہیاں۔ بے نظیر بھٹو دے شہادت دے ݙٰینھ تے آپݨے سنھیے اچ وفاقی وزیر اطلاعات آکھیے بے نظیر بھٹو تریمت سیاسی کارکناں کیتے ھک تحریک دا درجہ رکھیندیاں ہن جنہاں ہمیشہ آمریت کوں للکاریا۔ انہاں آکھیے محترمہ بے نظیر بھٹو ذاتی زندگی اچ ٻہوں ݙکھ جھلیے لیکن اوکھ انہاں دی سیاسی و جمہوری جدوجہد کوں مزید طاقتور تے تکڑا بݨیندی ڳئی ۔ آئین، پارلیمنٹ، جمہوریت، عوامی حقوق اتے سماجی بہتری کیتے بے نظیر بھٹو شہید دی جدوجہد ہمیشہ یاد رکھی ویسی، انہاں دی شہادت پاکستان دا ٻہوں وݙا ضیان ہئی جیں کوں قوم کݙاہیں بھلا نہ سڳسی ۔ وفاقی وزیر اطلاعات آکھیے اڄ دے ݙینھ سابق صدر آصف علی زرداری کوں وی خراج تحسین پیش کریندوں جنہاں “پاکستان کھپے” دا نعرہ لاتے پاکستان دے اتحاد کوں مزید تکڑا کیتا ہئی ۔ وفاقی وزیر اطلاعات سابق صدر آصف علی زرداری، بلاول، بختاور اتے آصفہ بھٹو سودھے سارے خاندان نال تعزیت دا اظہار کیتا تے دعا کیتی جو اللہ تعالیٰ شہید بے نظیر بھٹو کوں آپݨے جواررحمت اعلیٰ ترین مقام عطا فرماوے اتے لواحقین کوں صبر ݙیوے ۔