ملک، عوام تے جمہوریت کیتے تاریخی خدمات تے محترمہ بے نظیر بھٹو کوں خراج عقیدت پیش کریندوں ، وزیراعظم شہباز شریف

اسلام آباد۔27دسمبر(اے پی پی) وزیراعظم محمد شہباز شریف آکھیے 27 دسمبر 2007 عوام دی محبوب رہنما دی شہادت دا نہ بھلاوݨ آلا ݙینھ اے ،ملک، عوام اتے جمہوریت کیتے محترمہ بے نظیر بھٹو دی تاریخی خدمات تے انہاں کوں خراج عقیدت پیش کریندوں ،محترمہ بے نظیر بھٹو جمہوری وسیاسی جدوجہد دی روشن علامت ہن۔ وزیراعظم آفس دے میڈیا ونگ توں جاری بیان موجب وزیراعظم محمد شہباز شریف شہید محترمہ بے نظیربھٹو دے ورھیݨے تے انہاں کوں خراج عقیدت پیش کیتے ۔ وزیراعظم آکھیے محترمہ بے نظیر بھٹو جمہوری وسیاسی جدوجہد دی روشن علامت ہن جنہاں عوام دے حقوق دی جدوجہد اچ جام شہادت نوش کیتا ،27 دسمبر 2007 دا ݙینھ عوام دی ھک محبوب رہنما دی شہادت دا نہ بھلایا ونڄݨ آلا ݙینھ اے ۔وزیراعظم آکھیے اسلامی دنیا دی پہلی تریمت وزیراعظم بے نظیر بھٹو دی ساری عمر جہد مسلسل دی ولولہ انگیز داستان اے ،ملک، عوام تے جمہوریت کیتے محترمہ بے نظیر بھٹو دی تاریخی خدمات تے خراج عقیدت پیش کریندوں ،آئین دی سربلندی، آمریت دے خلاف انہاں دی پرعزم اتے نڈر عوامی و سیاسی تحریک تاریخ دا قابل فخر تے سنہرا باب اے ۔ وزیراعظم شہباز شریف آکھیے قائد محمد نوازشریف اتے محترمہ بے نظیر بھٹو ملک تے عوام کوں میثاق جمہوریت دا تاریخی تحفہ ݙتا، ملک دی سیاست اچ ھک نویں دور دا آغاز کیتا ،میثاق جمہوریت ساݙے قائدین دی سیاسی بصیرت دا ھک تاریخی کارنامہ اے جیں توں پاکستان ا ھک نویں سیاسی کلچر اتے روایت دا آغاز تھیا ۔ محترمہ بے نظیر بھٹو شہید دہشت گردی دے خلاف جرأت مندانہ اتے واضح موقف اختیار کیتا ۔وزیراعظم آکھیے محترمہ بے نظیر بھٹو دی شہادت دہشت گردی دے خلاف پاکستان دے آہنی عزم دا ثبوت اے۔ محترمہ بے نظیر بھٹو ملکی دفاع دی مضبوطی، آئینی اداریں دی تقویت اتے سماجی فلاح و بہبود کیتے ودھ ساری خدمات انجام ݙتیاں ۔وزیراعظم آکھیے سابق صدر زرداری، بلاول بھٹو سودھے اہل خانہ اتے شہید بے نظیر بھٹو دے سارے وابستگان نال تعزیت اتے ہمدردی کریندوں،اللہ تعالیٰ شہید بے نظیر بھٹو سودھے سارے شہدا دے درجات اچے کرے تے انہاں دے خاندان کوں صبر ݙیوے۔