پاکستان تحریک انصاف کوں سیلاب زدگان دی مشکلات اتے ودھدی دہشتگردی جیہے مسئلے توں کوئی سروکار کائنی، سینیٹر شیری رحمان

اسلام آباد۔30دسمبر(اے پی پی) وفاقی وزیر ماحولیاتی تبدیلی سینیٹر شیری رحمان آکھیے پاکستان تحریک انصاف کوں سیلاب زدگان دی مشکلات اتے ودھدی دہشتگردی جیہے مسئلیں توں کوئی سروکار کائنی، ایندی سیاست دا محور ملک اتے عوام نی بلکہ عمران خان دا ذاتی مفاد اے۔ ھک ٹویٹ اچ انہاں آکھیے ‏ملک اچ حالی وی 2کروڑ سیلاب زدگان کوں وختی امداد دی لوڑھ اے ، پی ٹی آئی سندھ اتے بلوچستان دے کروڑاں سیلاب متاثرین کوں پیغام ݙیندی پئی اے جو تساں کائنی عمران خان دی سیاست اہم اے، ݙوجھے پاسے دہشتگردی دے واقعات اچ وی ودھارا تھیندا پئے ، انہاں کوں سیلاب زدگان اتے ودھدی دہشتگردی توں کوئی سروکار کائنی ۔ انہاں آکھیے سارے منصوبے ناکام تھیوݨ دے بعد “پاکستان تحریک احتجاج” ھک واری ول مظاہرے کرݨ ویندی پئی اے، انہاں دی ترجیح صرف سیاست اچ متعلقہ رہݨ اتے ہیڈ لائینز بݨاوݨا اے ۔ انہاں آکھیے 2 شارٹ مارچ، استعفیں اتے اسمبلیاں تحلیل کرݨ دی تڑی اچ ناکامی دے بعد انہاں کنے احتجاج دے علاوہ کوئی آپشن نی بچیا، ‏”پاکستان تحریک احتجاج” نا ملک چلا سڳی نا ہی انہاں اچ پارلیمانی اپوزیشن دا کردار ادا کرݨ دی صلاحیت اے۔انہاں بس تقسیم، ڳالھیں مندے، الزام تراشی اتے کنٹیر دی سیاست کرݨی اے۔ شیری رحمان آکھیے لوک ہݨ انہاں دی طرز سیاست توں تنگ آچکن، انہاں دی سیاست دا محور ملک اتے عوام کائنی عمران خان دا ذاتی مفاد اے۔