صدر مملکت ڈاکٹر عارف علوی نال ناروے کیتے پاکستان دی نامزد سفیر سعدیہ الطاف قاضی دی ملاقات

اسلام آباد۔30دسمبر(اے پی پی):صدر مملکت ڈاکٹر عارف علوی ناروے نال تجارت، کاروبار، سرمایہ کاری، ماحول دوست توانائی، تعلیم، ہنرمندی، دفاع اتے برآمدات سودھے مختلف شعبیں اچ تعاون دی لوڑھ تے زور ݙیندے ہوئیں آکھیے جو ݙوہیں ملکاں وچال ݙو طرفہ تجارت کوں روایتی اتے غیر روایتی برآمدات کوں ودھا تے ایندے موجودہ حجم 128.404 ملین ڈالر ٹوں ودھایا ونڄ سڳدے۔ ایوان صدر دے پریس ونگ توں جاری بیان موجب صدر مملکت اے ڳالھ ناروے کیتے پاکستان دی نامزد سفیر سعدیہ الطاف قاضی نال ڳالھ مہاڑ کریندے ہوئیں آکھی اے جنہاں اتھاں ایوان صدر اچ انہاں دے نال ملاقات کیتی ۔ انہاں آکھیے نامزد سفیر پاکستانی تارکین وطن دے نال فعال طور تے رابطے برقرار رکھن اتے کونسلر خدمات ݙیون ۔صدر مملکت آکھیے سفیر ݙوہیں ملکاں دی جامعات اتے اداریں وچال تعلیمی، سائنسی، صنعتی تحقیق و ترقی اتے تعاون دے میدان اچ بامعنی اتے قابل عمل مواقع تلاش کرن۔ ڈاکٹر عارف علوی آکھیے ناروے دی پینوراما حکمت عملی 2021-2027 دے تحت تعلیمی تعاون کوں ودھاوݨ کیتے ترجیحی ملکاں دی فہرست اچ پاکستان کوں رلاوݨ کیتے وی کوششاں کیتیاں ونڄݨیاں چاہیدن ۔ انہاں آکھیے نامزد سفیر یورپین فری ٹریڈ ایسوسی ایشن نال تجارتی معاہدے تے کم تکھا کرݨ تے مستقبل اچ مشترکہ منصوبیں کیتے ݙوہیں ملکاں دے چیمبرز آف کامرس دے درمیان رابطے کیتے کم کرن ۔ صدر مملکت آکھیے مقبوضہ جموں و کشمیر اچ بھارت دی طرفوں مسلسل کیتے ونڄݨ آلے ظلم کوں چاوݨ دی لوڑھ اے ۔ صدر آکھیے اقلیتاں نال امتیازی سلوک، تڑیاں ، ہراساں کرݨ تے اقلیتاں کوں پسماندہ کرݨ دے ودھدے واقعات اتے اسلامو فوبیا دے ودھدے رجحان کوں وی چاوݨ دی لوڑھ اے ۔