دعا اے جو نواں سال پاکستان سودھے پوری دنیا توں بھک، جنگ، دہشتگردی، جرم، فرقہ واریت اتے طبقاتی تقسیم دے خاتمے دا سال ثابت تھیوے، وزیراعظم شہباز شریف دا نویں سال دے موقع تے پیغام

اسلام آباد۔ یکم جنوری (اے پی پی) وزیراعظم محمدشہبازشریف نویں سال دے شروع اچ معاشی صورتحال دی بہتری، سیلاب زدگان دی بحالی، دہشتگردی مکاوݨ تے عوام دیاں تکلیفاں گھٹاوݨ کیتے ݙینھ رات محنت داعہد کریندے ہوئیں آکھیے اساں ساریں کوں رل تے پاکستان کوں ترقی، خوشحالی اتے امن و آشتی دا گہوارہ بݨاوݨا اے ، دعا اے جو نواں سال پاکستان سودھے پورے دنیا توں بھک، جنگ، دہشتگردی، جرم، فرقہ واریت اتے طبقاتی ونڈ دے مکاوݨ دا سال ثابت تھیوے ۔ وزیراعظم اے ڳالھ نویں سال دے شروع تھیوݨ تے آپݨے پیغام اچ آکھی اے ۔ وزیراعظم آکھیے نویں سال دے آغاز تے او پوری قوم کوں مبارخ ݙیندن تے انہاں دیاں دعاواں ہن جو 2023 دا سجھ ساݙے ملک پاکستان کیتے ترقی اتے خوشحالی دی خوشخبری گھن تے ابھرے ،نویں سال اچ ساݙی انفرادی اتے اجتماعی زندگیاں اچ گزریل سال دی غلطیاں کوں سدھار تے ھک نویں شروعات تھیوے جیں اچ اساں ماضی دے ݙکھ بھال تے ھک نویں تے روشن مستقبل دا آغاز کروں۔ وزیراعظم آکھیے انہاں دی دعا اے جو 2022 اچ دنیا کوں جنہاں معاشی، سیاسی اتے امن و امان دے بحراناں دا سامݨا رہیا، نویں سال اچ انہاں تے قابو پاوݨ کیتے مثبت پیش رفت تھیوے ۔ وزیراعظم آکھیے گزریل سال وطنِ عزیز کوں ٻہوں ساری اوکھ دا سامݨا رہیا ،پاکستان دی معیشت تے عوام دے وسیع تر مفاد اچ جݙاں اساں آئینی رستہ اپنیندے ہوئیں حکومت سنبھالی تاں ملک اچ آئینی بحران اتے افراتفری پیدا کرݨ دی کوشش کیتی ڳئی ۔ ملکی معیشت کوں دیوالیہ تھیوݨ توں بچاوݨ کیتے اتحادی حکومت ملکی سلامتی کیتے اپݨی سیاست قربان کریندے ہوئیں حالات تے قابو پاوݨ کیتے شبانہ روز محنت کیتی تے اللہ دے فضل و کرم نال اساں ایندے اچ کافی حد تئیں کامیاب تھی ڳیوں ۔ وزیراعظم آکھیے ایں دوران موسمیاتی تبدیلی پاروں ملک اچ بدترین سیلابی صورتحال بݨی جیں توں سینکڑاں لوک لقمہ اجل بݨیے، ہزاراں زخمی تھئے ، مجموعی طور تے 3 کروڑ توں ودھ لوک متاثر تھئے تے مالی اعتبار نال پاکستان جیہے ترقی پذیر ملک کوں 30 ارب ڈالر دا ضیان تھیا ، سیلاب زدگان دی مدد دی نگرانی میں خود بطور خادمِ پاکستان کیتی تے ݙکھاں اچ پتھے لوکاں کنے ونڄ تے انہاں دے درد کوں گھٹ کرݨ دی کوشش کیتی ۔ میں سودھے اتحادی حکومت دے ہر عہدیدار دنیا دی چنڈ چنڈ اچ سیلاب زدگان دی پکار پڄائی ۔ وزیراعظم آکھیے او نویں سال دا آغاز پاکستان دی معاشی صورتحال دی بہتری، سیلاب زدگان دی بحالی، دہشتگردی مکاوݨ تے عوام دیاں تکلیفاں گھٹاوݨ کیتے ݙینھ رات محنت دے عہد نال کریندے پئن ، 2023 اچ اساں ساریں کوں رل تے پاکستان کوں ترقی، خوشحالی تے امن و آشتی دا گہوارہ بݨاوݨا اے ۔ وزیراعظم آکھیے آؤ، نویں سال دے آغاز اچ اساں اے وعدہ کروں جو ایں ملک کوں قائد اعظم تے علامہ اقبال دا پاکستان بݨاوݨ کیتے کہیں وی قربانی توں پچھوں نہ ہٹسوں ۔ اے ملک ساݙی امانت اے ، اساں ایندی حفاظت تے تعمیر و ترقی اچ آپݨا خون پسینہ ھک کریسوں ۔ پاکستان پائندہ باد.