عمران خان ساݙے 6 مہینے دا نئیں اپݨے 4 سالہ کالے دور اقتدار دی تباہی دا وائٹ پیپر ݙیون ، وفاقی وزیر اطلاعات

اسلام آباد۔3جنوری(اے پی پی)وفاقی وزیراطلاعات ونشریات مریم اورنگزیب آکھیے جو پاکستان دی معیشت کوں تباہ کرݨ اتے ݙیوالہ تھیوݨ دی کندھی تے سٹݨ آلیاں کوں وائٹ پیپر ݙیندے شرم آوݨی چاہیدی ہئی، کوئی وائٹ پیپر تہاݙے کالے کرتوت ٻڳے نئیں کر سڳدا۔ چیئرمین تحریک انصاف عمران خاں کوں ولدا ݙیندے وفاقی وزیر اطلاعات مریم اورنگزیب آکھیے جو پاکستان دے عوام اتے معیشت کوں تباہ کرݨ آلیاں اڄ وائٹ پیپر جاری کیتے، وائٹ پیپر اچ انہاں کوں عوام توں معافی منڳݨی چاہیدی ہئی۔ مریم اونگزیب آکھیا جو 2013ء توں 2018ء تئیں پاکستان معاشی طور تے ترقی کریندا پیا ہا ٻھل انہاں ترقی کریندے ایں پاکستان کوں اڄاڑ رکھیے، ملکی معیشت تباہ کیتی۔ انہاں آکھیا جو 2013ء توں 2018ء تئیں دا وائٹ پیپر ݙیوݨا چاہیدا ہا جو پی ٹی آئی کوں کینڄھا ملک ملیا ہا، کوئی وی وائٹ پیپر انہاں دی کرپشن، چوری اتے معاشی تباہی کوں بھلا نئیں سڳدا۔ انہاں آکھیا جو مسلم لیگ (ن) دی حکومت 2018ء اچ 6.1 فیصد تے ترقی کریندا ملک چھوڑ گئی ہئی، سی پیک کامیابی نال چلدا پیا ہا، 14 ہزار میگاواٹ بجلی ٻݨا ݙتی ہئی، مہنگائی دی شرح 3.8 فیصد ہئی، دہشتگردی مکا تے پرامن، خوشحال پاکستان ݙتا ہا۔ مریم اورنگزیب آکھیے جو وائٹ پیپر اچ لکھݨا پوسی جو 4 سال اچ تساں کشمیر دا سودا کیتے، ملک ٻوڑیے، معاشی تباہی ایں 6 مہینے نئیں تہاݙے 4 سال اچ آئی، وائٹ پیپرجاری کرتے لوکاں کوں بیوقوف نئیں ٻݨا سڳدے، پنجاب، خیبرپختونخوا اچ اٹے دے بحران، کے پی کے اچ دہشت گردی اتے اپݨیاں آڈیو لیکس تے وی وائٹ پیپر ݙیوو، اپݨے چار سالان دا وائت پیپر کتھے؟ توشہ خانہ دی چوریاں وی لکھو، اے وائٹ پیپر نئیں تہاݙا کالا اعمال نامہ اے۔